ოპოზიციონერი პოლიტიკოსი ჯონდი ბაღათურია საქართველოს პრეზიდენტის პარლამენტში გამოსვლის შემდეგ გეგმავს სააკაშვილს შეახსენოს, რომ ქვეყანა მძიმე სოციალურ-ეკონომიკურ მდგომარეობაში იმყოფება.
როგორც სააგენტო "ჯი-ეიჩ-ენს" "ქართული დასის" ლიდერმა ჯონდი ბაღათურიამ განუცხადა, პრეზიდენტის სიტყვით გამოსვლის შემდეგ იგი თავის გამოსვლაში ყურადღებას საქართველოში არსებულ მძიმე სოციალურ ვითარებაზე გაამახვილებს.
"ქვეყანაში ადამიანის უფლების თვალსაზრისით უმძიმესი სოციალური და სამართლებრივი ფონია შექმნილი. მიუხედავად დაპირებული დემოკრატიის ტალღებისა და ტაიფუნებისა, უფრო მძიმე მდგომარეობაა სასამართლო სისტემაში, სიტყვის თავისუფლების კუთხით, ასევე საკუთრების დაცვის კუთხით და გვაქვს წარუმატებელი ნაბიჯები საგარეო პოლიტიკაში, რამაც შეიძლება ძლიერი დარტყმა მიაყენოს სახელმწიფოს პოლიტიკური, სოციალური და სამართლებრივი თვალსაზრისით", - აღნიშნა ბაღათურიამ.
მისივე თქმით, ქართული ეკონომიკა ევროპის და აშშ-ის დახმარებით არსებობს, რადგანაც "ეკონომიკა გააჩანაგეს _ გაპარტახებულია სოფლის მეურნეობაც".
"ის, რაც 2004 წელს სოფლის მეურნეობის სფეროში იყო ამ დროისთვის მისი 75% განადგურებულია", - აღნიშნა დეპუტატმა.
შეგახსენებთ, რომ საქართველოს პრეზიდენტი მიხეილ სააკაშვილი პარლამენტის წინაშე ყოველწლიურ მოხსნებით სავარაუდოდ 10 თებერვალს წარდგება. მიუხედავად იმისა, რომ ჯერ პრეზიდენტის გამოსვლის ფორმატი არ არის დაზუსტებული დამოუკიდებელმა, ოპოზიციონერმა დეპუტატებმა გიორგი ცაგარეიშვილმა და ჯონდი ბაღათურიამ ბიუროს სიტყვის გამოსვლის სურვილით უკვე მიმართეს.
პრეზიდენტ სააკაშვილის საკანონმდებლო ორგანოში გამოსვლის ზუსტი თარიღი და ფორმატი მომავალ ბიუროს სხდომაზე, 7 თებერვალს დამტკიცდება.