ადამიანის უფლებათა დაცვის ევროპულ სასამართლოში საქართველოს სარჩელთან დაკავშირებით რუსეთის მხარის მოწმეების დაკითხვა მიმდინარეობს.
პროცესი დაახლოებით 2 საათის წინ დაიწყო. დღის განმავლობაში სასამართლო სულ 6 მოწმეს დაკითხავს, რომლებიც მილიციის მაღალჩინოსნები და მიგრაციის სამსახურის თანამშრომლები არიან.
აღსანიშნავია, რომ მოწმეებს შეკითხვებს დაუსვამს ქართული მხარეც, რომელიც იუსტიციის მინისტრის მოადგილის თინა ბურჯალიანის განცხადებით, "ძალიან მწვავე იქნება".
"ჩვენ გვაქვს შესაძლებლობა მათ დავუსვათ შეკითხვები და ეს ნამდვილად არ იქნება მარტივი და მათთვის ადვილად პასუხგასაცემი", - განუცხადა ბურჯალიანმა ჟურნალისტებს.
ამასთან, ის დარწმუნებულია, რომ რუს მოწმეებს სასამართლოსთვის ქართული მხარის მიერ მიწოდებული მტკიცებულებების "გაბათილება" გაუჭირდებათ.
სტრასბურგის ადამიანის უფლებათა დაცვის ევროპული სასამართლო რუსეთის მიერ წარდგენილი მოწმეების დაკითვას ხვალ, 3 თებერვალსაც გააგრძელებს. წინასწარი ინფორმაციით, ხვალ 2006 წელს საქართველოში რუსეთის კონსულის დაკითხვა იგეგმება.
უკვე 4 თებერვლიდან კი, სასამართლო დამოუკიდებელ ექსპერტებს მოუსმენს.
შეგახსენებთ, რომ სტრასბურგის სასამართლოში რუსეთის წინააღმდეგ საქართველოს სარჩელის განხილვა მიმდინარეობს. საქმე ეხება 2006 წელს რუსეთიდან ქართველების მასობრივ დეპორტაციას, რაც თბილისის შეფასებით, ეთნიკურ ნიადაგზე მოხდა.
სასამართლომ გასული ორი დღის განმავლობაში მოწმის სახით რამდენიმე დაზარალებული ქართველი დაკითხა. ასევე დაიკითხა იმ პერიოდში, რუსეთში საქართველოს კონსული ზურაბ პატარიძეც.
