თბილისის საქალაქო სასამართლოში მანდატურის სამსახურსა და მოქალაქეებს შორის ფიზიკური დაპირისპირება მოხდა.
მოქალაქეებსა და მანდატურის სამსახურს შორის დაპირისპირება მაშინ მოხდა, როდესაც ბრალდებულ გიორგი მინდაძის სასამართლო პროცესი უნდა დაწყებულიყო.
აქტივისტებისა და მინდაძის ოჯახის წევრების უკმაყოფილება, პროცესის მე-15 დარბაზში ჩატარებამ გამოიწვია, ეს დარბაზი იმდენად მცირე ზომისაა, რომ ყველა მსურველი შესვლას ვერ ახერხებს.
მანდატურებმა მოქალაქეები, ვინც პროტესტი გამოთქვა, შენობიდან ძალის გამოყენებით გაიყვანეს.
დაპირისპირების ვიდეოკადრები მოქალაქეებმა სოციალურ ქსელში გაავრცელეს.
ამ წუთებში გიორგი მინდაძის სასამართლო პროცესი მიმდინარეობს.
სამედიცინო უნივერსიტეტის სტუდენტს, გიორგი მინდაძეს ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. კერძოდ, მას ედავებიან, რომ 29 ნოემბერს, პოლიციელს პიროტექნიკა ესროლა, რის შედეგადაც მან ფეხზე დაზიანება მიიღო.
