ისრაელის თავდაცვის ძალებმა (IDF) 17 ივნისს განაცხადეს, რომ ირანის შეიარაღებული ძალების გენშტაბის ახალი უფროსი, ალი შადმანი, მოკლეს.
შადმანი ამ თანამდებობაზე რამდენიმე დღის წინ დაინიშნა, მას შემდეგ, რაც მისი წინამორბედი ისრაელის ძალებმა გაანადგურეს.
„ისრაელის თავდაცვის ძალების დაზვერვის დირექტორატის მიერ მიღებული ზუსტი ინფორმაციის შედეგად, ისრაელის საჰაერო ძალებმა სამშაბათს ღამით თეირანის ცენტრში მდებარე სამეთაურო ცენტრს დაარტყა და ალი შადმანი მოკლა“, - ნათქვამია ისრაელის არმიის განცხადებაში და აღნიშნულია, რომ შადმანი ირანის უზენაესი ლიდერის, აიათოლა ალი ხამენეის, ერთ-ერთი უახლოესი თანამებრძოლი იყო.
აღნიშნულ თანამდებობაზე დანიშვნამდე შადმანი ირანის შეიარაღებული ძალების საგანგებო სიტუაციების სარდლობას ხელმძღვანელობდა.
მის დაქვემდებარებაში იმყოფებოდა, როგორც ისლამური რევოლუციის გუშაგთა კორპუსი (IRGC), ასევე ქვეყნის რეგულარული არმია. შადმანის ხელმძღვანელობით „ხათამ ალ-ანბიას“ საგანგებო სიტუაციების მართვის ცენტრი პასუხისმგებელი იყო საბრძოლო ოპერაციების წარმართვასა და ირანის ცეცხლსასროლი იარაღის გამოყენების გეგმების დამტკიცებაზე.
ისრაელის თავდაცვის ძალებმა აღნიშნა, რომ სხვადასხვა თანამდებობაზე ალი შადმანი პირდაპირ გავლენას ახდენდა თეირანის ისრაელის წინააღმდეგ მიმართულ ოპერატიულ გეგმებზე.
ისრაელის თავდაცვის ძალებში აღნიშნავენ, რომ შადმანის მკვლელობა ირანის უმაღლესი სამხედრო ხელმძღვანელობის განადგურების ოპერაციების სერიის გაგრძელებაა და ირანის შეიარაღებული ძალების სამეთაურო სტრუქტურას ასუსტებს.
ისლამური რესპუბლიკის გენშტაბის წინა უფროსი, მოჰამედ ბაგერი, 13 ივნისს ისრაელის საჰაერო დარტყმის შედეგად დაიღუპა.
მასთან ერთად დაიღუპა სულ მცირე 20 მაღალი რანგის მეთაური, მათ შორის „ისლამური რევოლუციის გუშაგთა კორპუსის“ მეთაური ჰოსეინ სალამი და „ხათამ ალ-ანბიას“ საგანგებო სიტუაციების რეაგირების შტაბის უფროსი, ღოლამ-ალი რაშიდი. ისრაელის თავდაცვის ძალებმა ასევე გამოაცხადა საჰაერო ძალების მეთაურის ამირ ალი ჰაჯიზადეს, დრონების ავიაციის მეთაურის ტაჰერ პოურის და საჰაერო თავდაცვის მეთაურის დაუდ შიჰიანის დაღუპვის შესახებ.
