ლევან იოსელიანმა პარლამენტში ანგარიშის წარდგენის შემდეგ, "ქართული ოცნების" დეპუტატების მიერ დასმულ შეკითხვებზე პასუხისას თქვა, რომ სახალხო დამცველის აპარატში რეორგანიზების საფუძველს არ უნდა წარმოადგენდეს ის თუ "ის პერიოდში არის მოყვანილი ან ვინ იყო სახალხო დამცველი იმ დროს".
"მე ვმუშაობ იმ ადამიანებთან, რომლებიც დამხვდნენ სახალხო დამცველის აპარატში. მნიშვნელოვანი ნაწილი არის ბატონი სოზარ სუბარის დროინდელი [თანამშრომელი], შემდეგ არის სხვა სახალხო დამცველების დროს მისული ადამიანები. მე არ ვფიქრობ, რომ თუ ადამიანები თავის საქმეს კეთილსინდისიერად ასრულებენ, ვის პერიოდში არის მოყვანილი ან ვინ იყო სახალხო დამცველი იმ დროს, ამით უნდა განვსაჯო მათი მომავალი და ეს უნდა იყოს რეორგანიზაციის საფუძველი. რეორგანიზაციის საფუძველი შეიძლება იყოს ბევრი სხვა რამ, მაგრამ არა ეს". - თქვა იოსელიანმა.
„ქართული ოცნების” წევრებმა უკმაყოფილოება გამოთქვეს იმის გამო, რომ სახალხო დამცველის ანგარიშში, მათ შორის, აღნიშნულია, რომ ნოემბერ-დეკემბერში საპროტესტო აქციებზე დაირღვა მოქალაქეების უფლებები, ხაზგასმულია პოლიციელების მხრიდან არაადამიანური, ღირსების შემლახავი მოპყრობა, წამება, სამართლიანი სასამართლოს უფლების დარღვევა, ასევე საუბარია ჟურნალისტების მიმართ არასათანადო მოპყრობასა და საქმიანობაში ხელის შეშლაზე.
"ქართული ოცნების" თეა წულუკიანმა იოსელიანს სიტყვით მიმართა და ჰკითხა ჩაატარა თუ არა რეორგანიზება და ხომ არ მუშაობს ისევ "ქალბატონი მავნებელი ლომჯარიას კადრებთან ერთად".
