კრემლის მეთაურის ვლადიმირ პუტინის მრჩეველმა, უკრაინასთან მოლაპარაკებებზე რუსეთის დელეგაციის ხელმძღვანელმა, ვლადიმირ მედინსკიმ განაცხადა, რომ 2022 წელს რუსეთი უკრაინას სამშვიდობო მოლაპარაკებების მსვლელობისას უკეთეს პირობებს სთავაზობდა.
მედინსკიმ განაცხადა, რომ თუ უკრაინა მზად იქნებოდა და „თუ გადაწყვეტილებას თავად მიიღებდა“, მაშინ სამშვიდობო ხელშეკრულებას ხელი 2022 წლის 28 თებერვალს მოეწერებოდა და მას 2025 წელთან შედარებით „უფრო რბილი“ პირობები ექნებოდა.
მედინსკი ამტკიცებს, „მათ მხოლოდ ის სურდათ, რომ უკრაინას უარი ეთქვა ნატო-ში გაწევრიანებაზე და მის ტერიტორიაზე უცხოური სამხედრო ბაზების განთავსებაზე“.
ასევე საუბარი იყო უკრაინაში რუსული ენისა და უკრაინის მართლმადიდებლური ეკლესიის თანაბარ უფლებებზე და ყირიმის რუსეთის ნაწილად აღიარებაზე, რადგან იქ, მედინსკის მტკიცებით, „ჩატარდა ყველაზე დემოკრატიული რეფერენდუმი, რაც კი შეიძლება წარმოიდგინოთ“.
მან თქვა, რომ მას შემდეგ, რაც რუსეთის დელეგაციამ 2022 წელს ხელშეკრულების პროექტი წარადგინა, უკრაინის პრეზიდენტი ვოლოდიმირ ზელენსკი „ორი კვირის განმავლობაში დუმდა“ და ამ პერიოდში დიდი ბრიტანეთისა და შეერთებული შტატების წარმომადგენლებს ხვდებოდა.
პუტინის მრჩევლის მტკიცებით, უკრაინამ მშვიდობაზე უარი ბორის ჯონსონისა და აშშ-ს იმდროინდელი ადმინისტრაციის რჩევით თქვა:
"უცხოელი პარტნიორები რუსეთთან სამშვიდობო მოლაპარაკებების დადების წინააღმდეგები იყვნენ".
