გერმანიის კანცლერმა ფრიდრიხ მერცმა განაცხადა, რომ რუსეთის წინააღმდეგ სანქციების ახალი პაკეტი შესაძლოა ბრიუსელში, 20 მაისს დაგეგმილ ევროკავშირის საბჭოს სხდომაზე მიიღონ.
ამის შესახებ ის სოციალურ ქსელ Х-ში წერს.
მერცმა უკრაინის პრეზიდენტის, ვოლოდიმირ ზელენსკის სტამბოლში მოლაპარაკებებზე გამგზავრება „დიდ დათმობად“ შეაფასა.
ამასთან აღნიშნა, რომ რუსეთის ლიდერმა ვლადიმირ პუტინმა, თურქეთში წაუსვლელობით, თავი წამგებიან პოზიციაზე დააყენა. გერმანიის კანცლერმა ასევე დაადასტურა, რომ რუსეთის წინააღმდეგ სანქციების ახალი პაკეტი მზადაა მისაღებად.
„პუტინი არ გამოჩნდა, რითაც თავი წამგებიან პოზიციაზე დააყენა. სანქციათა ახალი პაკეტი უკვე მზადაა, ჩვენ მას სამშაბათს ბრიუსელში მივიღებთ“, – წერს კანცლერი.
როგორც ცნობილია, 6 მაისს ევროკავშირის წარმომადგენლებმა დაიწყეს რუსეთის წინააღმდეგ სანქციების მე-17 პაკეტის განხილვა, რომელიც რუსეთის ომის მანქანის, ასევე მოსკოვის ე.წ. „ჩრდილოვანი ფლოტის“ წინააღმდეგ არის მიმართული.
