საქალაქო სასამართლომ გიორგი ბაჩიაშვილს ბიძინა ივანიშვილისთვის 9000-მდე ბიტკოინის გადახდა დააკისრა. გადაწყვეტილება მოსამართლე ზაალ მარუაშვილმა გამოაცხადა.
თანაინვესტირების ფონდის ყოფილ ხელმძღვანელს ბიტკოინების საქმეზე სასამართლომ 11 თვით თავისუფლების აღკვეთა 10 მარტს მიუსაჯა.
რახან გადაწყვეტილების გამოცხადების მომენტში ბაჩიაშვილი საქართველოში აღარ იმყოფებოდა, ივანიშვილმა მის წინააღმდეგ ახალი სარჩელი შეიტანა და ბიტკოინების დაბრუნება მოითხოვა.
მოსამართლემ საქმე დაჩქარებულად განიხილა.
მოსამართლის გადაწყვეტილებით, იმ შემთხვევაში, თუ გიორგი ბაჩიაშვილი ბიტკოინებით გადახდაზე უარს იტყვის, მაშინ მან ბიძინა ივანიშვილს ამ რაოდენობის თანხა უნდა დაუბრუნოს უკან, რასაც ბიტკოინი გადაწყვეტილების გამოცხადების მომენტში მოიაზრებს.
როგორც ბაჩიაშვილის ადვოკატმა, სოფო ქურდაულმა აღნიშნა, დაცვის მხარე სასამართლოს გადაწყვეტილებას არ ეთანხმება და მას სააპელაციო სასამართლოში გაასაჩივრებს.
გიორგი ბაჩიაშვილს ბრალი სისხლის სამართლის 3 საქმეზე აქვს წარდგენილი და სამივე მათგანზე აღკვეთის ღონისძიების სახით პატიმრობა დაუსწრებლად აქვს შეფარდებული.
ბაჩიაშვილს პირველი ბრალი 2023 წლის 5 ივლისს წარუდგინეს. ივანიშვილი მას ბიტკოინების მითვისებას ედავება. თუმცა, ბაჩიაშვილი ამტკიცებს, რომ ამ საქმეში ოლიგარქი არა ინვესტორი, არამედ მსესხებელია.
პროკურატურის ინფორმაციით, "ბაჩიაშვილმა ინვესტორს ჩადებული ინვესტიციიდან მიღებული სრული მოგების სანაცვლოდ მხოლოდ 536 900 აშშ დოლარი გადასცა, ხოლო დარჩენილი ინვესტორის კუთვნილი 8986 ოდენობის ბიტკოინი მართლსაწინააღმდეგოდ მიითვისა, რომლის ღირებულებაც მისი მართლსაწინააღმდეგოდ დაუფლების პერიოდში 43 მილიონამდე აშშ დოლარი იყო".
ბაჩიაშვილს თავდაპირველად აღკვეთის ღონისძიების სახით 2 500 000-ლარიანი გირაო ჰქონდა შეფარდებული, ასევე დაწესებული ჰქონდა დამატებითი შემზღუდავი ღონისძიებები. თუმცა, მას შემდეგ რაც ბაჩიაშვილმა ქვეყანა დატოვა, ამ საქმეზე გირაო პატიმრობით შეეცვალა. ისევე, როგორც "მტკვარი ჰესის" საქმეზე, რომელზეც პროკურატურამ ბრალი 25 თებერვალს წარუდგინა სსკ-ის 2201-ე მუხლის მე-2 ნაწილით, რაც სპეციალური უფლებამოსილების მქონე პირის მიერ სამსახურებრივი მოვალეობის შეუსრულებლობას ან არაჯეროვნად შესრულებას გულისხმობს, რამაც მძიმე შედეგი გამოიწვია. ბრალდება 2-დან 5- წლამდე თავისუფლების აღკვეთას ითვალისწინებს.
ბაჩიაშვილს მესამე ბრალი საქართველოს სახელმწიფო საზღვრის უკანონო კვეთის საქმეზე აქვს წაყენებული და აღკვეთის ღონისძიების სახით, დაუსწრებლად, ასევე პატიმრობა აქვს შეფარდებული.
