უკრაინის საგარეო საქმეთა სამინისტრომ ჩინეთის ელჩი რუსეთის ფედერაციის მხრიდან ომში მისი მოქალაქეების მონაწილეობის გამო დაიბარა.
საგარეო საქმეთა სამინისტროს განცხადებით, მინისტრის მოადგილემ ევგენი პერებიინისმა განუცხადა მა შენკუნს, რომ ჩინეთის მოქალაქეების მონაწილეობა უკრაინის წინააღმდეგ ომში და ჩინური კომპანიების მონაწილეობა რუსეთში სამხედრო პროდუქციის წარმოებაში სერიოზულ შეშფოთებას იწვევს და ეწინააღმდეგება პარტნიორულ ურთიერთობებს.
უკრაინის სადაზვერვო სამსახურებმა ჩინურ მხარეს გადასცეს მსგავსი ფაქტების მტკიცებულება, დიპლომატებმა კი პეკინს მოუწოდეს შეწყვიტოს რუსეთის აგრესიის მხარდაჭერა.
„ჩვენი სახელმწიფო აფასებს ჩინეთთან სტრატეგიულ პარტნიორობას და მოელის, რომ ჩინეთი თავს შეიკავებს ისეთი ნაბიჯებისგან, რომლებიც მომავალში ორმხრივ ურთიერთობებს დააზარალებს“, - აღნიშნულია უკრაინის საგარეო უწყების განცხადებაში.
