აშშ-ის ფედერალურმა მოსამართლემ აშშ-ის პრეზიდენტის, დონალდ ტრამპის ადმინისტრაციას „ამერიკის ხმის“ საქმიანობის აღდგენა დაავალა.
"ამერიკის ხმის" გარდა მოსამართლის გადაწყვეტილება რადიოებზე USAGM Radio Free Asia და Middle East Broadcasting Network-ზეც ვრცელდება.
კონკრეტულად, მოსამართლე აშშ-ის პრეზიდენტის ადმინისტრაციას ავალებს „ამერიკის ხმის“ ყველა თანამშრომლის სამსახურში აღდგენას, რომლებიც 14 მარტს გაათავისუფლეს ან შვებულებაში გაუშვეს, ასევე აშშ-ის გლობალური მედიის სააგენტოს (USAGM) მხრიდან მაუწყებლის დაფინანსების განახლებას.
მარტში ამერიკის გლობალური მედიის სააგენტოს (USAGM) დირექტორის მოვალეობის შემსრულებელმა ვიქტორ მორალესმა და სპეციალურმა მრჩეველმა კერი ლეიკმა იძულებით შვებულებაში გაუშვეს 1300-ზე მეტი თანამშრომელი და დაფინანსება შეუწყვიტეს რამდენიმე მედიაორგანიზაციას (მათ შორის რადიო თავისუფალ ევროპა/რადიო თავისუფლებას), რომლებსაც USAGM უწევს ზედამხედველობას.
მედიაორგანიზაციების დახურვა და მათთვის დაფინანსების შეწყვეტა აშშ-ის პრეზიდენტ დონალდ ტრამპისა და მილიარდერ ილონ მასკის ფართო მასშტაბის კამპანიის ნაწილია, რომლის მიზანია ფედერალური მთავრობის შემცირება. მათი თქმით, მთავრობა აშშ-ის გადასახადების გადამხდელთა ფულს ხარჯავს მიზნებისთვის, რომლებიც არ შეესაბამება აშშ-ის ინტერესებს.
