"ქართული პარტია" ტელეკომპანია "პირველი საინფორმაციო კავკასიურის" პირდაპირ ეთერში პრეზიდენტის გამოსვლა ეხმაურება. "ქართულმა პარტიამ" პრეზიდენტი რეალობის "მოდერილებაში" დაადანაშაულა.
პარტიის წარმომადგენლები პრეზიდენტისგან, ვეტერანების მისამართით გაკეთებული განცხადებების გამო, საჯაროდ ბოდიშის მოხდას მოითხოვენ.
ქართული პარტია მიიჩნევს, რომ 25 იანვრის სატელევეზიო გამოსვლაში საქართველოს პრეზიდენტმა შეგნებულად იცრუა და შეურაცხყოფა მიაყენა ვეტერან მეომრებს, რისთვისაც მიხეილ სააკაშვილმა მათ წინაშე საჯაროდ ბოდიში უნდა მოიხადოს.
"25 იანვარს გადაცემაში - "პრეზიდენტი პასუხობს შეკითხვებს" - გამოსვლისას, მიხეილ სააკაშვილმა საზოგადოებას უამრავი არასწორი ინფორმაცია მიაწოდა და ქვეყანაში არსებული ვითარება, სოციალურ-პოლიტიკური მდგომარეობის ამსახველი სურათი შეგნებულად დაამახინჯა. განსაკუთრებით ცინიკური და აღმაშფოთებელი იყო პრეზიდენტის ის შეფასებები, რომლებიც გმირთა მოედანზე ვეტერანი მეომრების საპროტესტო აქციის ძალის გამოყენებით დაშლას შეეხებოდა. სააკაშვილმა ცილი დასწამა სამშობლოსთვის მებრძოლ ადამიანებს, თითქოს მათ წაბილწეს გმირთა მემორიალი და შეურაცხყვეს საპატიო ყარაულში მდგარი ჯარისკაცები. პრეზიდენტის ეს განცხადება სიცრუეა და მიზანად ისახავს ქვეყნისთვის თავდადებული ადამიანების დისკრედიტაციას. ეს ადამიანები ასეთ უმსგავსობას თუნდაც იმიტომ არ ჩაიდენდნენ, რომ გმირთა მემორიალი, მათივე თქმით, "ეკლესიის შემდეგ, ყველაზე წმინდა ადგილია". აღსანიშნავია, რომ ასეთი ბინძური ფანტაზია შინაგან საქმეთა სამინისტროს ხელმძღვანელობასაც არ მოსვლია, წინააღმდეგ შემთხვევაში, შსს-ის მიერ 4 იანვარს გავრცელებულ განცხადებაში ეს "ფაქტები" აუცილებლად იქნებოდა მოხსენიებული. გარდა ამისა, სააკაშვილის მიერ გამოთქმული ბრალდებების შესახებ აქციის დაშლის შემდეგ დაკავებული პირების სასამართლო პროცესზე სიტყვაც არ თქმულა", - აღნიშნულია სოზარ სუბარის პარტიის მიერ გავრცელებულ განცხადებაში.
განცხადების მიხედვით, საქართველოს პრეზიდენტმა აღიარა, რომ საზოგადოების შეცდომაში შეყვანის მცდელობა მისთვის უცხო არ არის და ეს მეთოდი მას დევნილებთან მიმართებაშიც გამოუყენებია.
"სააკაშვილს არ დაუმალავს, რომ შეგნებულად იცრუა, როდესაც, წინასაარჩევნო კამპანიის დროს, დევნილ მოსახლეობას საახალწლოდ სოხუმში დაბრუნებას დაჰპირდა. ამასთან, საქართველოს პრეზიდენტი უტიფრად ითხოვს, მსგავსი ცრუ დაპირებებისთვის მომავალში მას "სიტყვაზე არავინ გამოეკიდოს", - განმარტავს "ქართული პარტია".
