გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი უზბეკეთის რესპუბლიკაში გამართულ მაღალი დონის ღონისძიებას „სამარყანდის საერთაშორისო კლიმატის ფორუმი“ დაესწრო. ფორუმის ფარგლებში მინისტრის მოადგილემ საქართველოს კლიმატის ცვლილების პოლიტიკის კუთხით ქვეყნის პრიორიტეტებსა და მიღწევებზე გაამახვილა ყურადღება.
„საქართველო მზად არის ითანამშრომლოს როგორც რეგიონულ, ისე გლობალურ დონეზე კლიმატის მდგრადობისა და ცირკულარული ეკონომიკის პრინციპების დანერგვის ხელშეწყობისთვის. სხვადასხვა პლატფორმა, მათ შორის ცენტრალური აზიის რეგიონული ეკონომიკური თანამშრომლობის პროგრამა, ქმნის მნიშვნელოვან ჩარჩოს ერთობლივი მოქმედებისთვის. მხოლოდ კოორდინირებული ძალისხმევის გზით შეგვიძლია დავძლიოთ ეს გამოწვევები, მივაღწიოთ კლიმატის ცვლილების შერბილების ამბიციურ მიზნებს და შევქმნათ მდგრადი მომავალი ახალი თაობებისთვის“, - აღნიშნა სოლომონ პავლიაშვილმა.
ფორუმის მიზანს კლიმატის ცვლილებისადმი ადაპტაციის გაძლიერება, ფინანსური და ტექნოლოგიური რესურსების მობილიზება და კლიმატის პოლიტიკის რეგიონული და გლობალური გამოწვევების განხილვა წარმოადგენდა. ფორუმზე განსაკუთრებული ყურადღება დაეთმო გარემოს დაცვისა და კლიმატის ცვლილების მიმართულებით რეგიონული თანამშრომლობის გაძლიერების მნიშვნელობას.
„სამარყანდის საერთაშორისო კლიმატის ფორუმი“ უზბეკეთის რესპუბლიკის მთავრობის ორგანიზებით გაიმართა. ღონისძიებაში მონაწილეობა მიიღეს აზიის რეგიონის ქვეყნების პრეზიდენტებმა, ევროპის კომისიისა და ევროპის საბჭოს პრეზიდენტებმა, გაეროს და სხვა საერთაშორისო ორგანიზაციების ლიდერებმა, სხვადასხვა ქვეყნის გარემოს დაცვის მინისტრებმა, საფინანსო სექტორისა და სამოქალაქო საზოგადოების წარმომადგენლებმა.
