რასაც 2008 წელს რუსეთმა ტანკებით ვერ მიაღწია, ახლა დაპყრობას ჰიბრიდული ძალებით ცდილობს, - ამის შესახებ საქართველოს მეხუთე პრეზიდენტმა სალომე ზურაბიშვილმა ჩეხეთის სენატში სიტყვით გამოსვლისას განაცხადა.

მისი თქმით, ევროპამ ნაბიჯები უნდა გადადგას ახლავე, არა სიტყვებით, არამედ საპასუხო სტრატეგიით.

"დღეს მე თქვენთან მოვიტანე გაფრთხილება და მოწოდება ქმედებებისკენ, საქართველოს ტრანსფორმაცია მიმდინარეობს არა ტანკებით, არამედ რეპრესიული კანონებით, არა ერთ ღამეში, არამედ ნაბიჯ-ნაბიჯ. ჩვენ ვხედავთ, როგორ შლიან ჩვენს დემოკრატიას. მშვიდობიანი მოქალაქეების წინააღმდეგ იყენებენ ძალადობას, მათ აკავებენ, ოპოზიციურ პარტიებს ემუქრება აკრძალვა და დაშლა. ათასობით ევროს ეკვივალენტის ჯარიმები იწერება მოქალაქეებისადმი და მედიაორგანიზაციებისთვის. მიიღეს უცხოური აგენტის კანონი, რომელიც არის ასლი რუსული კანონისა, რომელიც გამოყენებულია იქ მედიის რეპრესირებისთვის.  ერთი საწინააღმდეგო გადაწყვეტილებაც არ მიღებულა სასამართლოში. ჩვენ ვხედავთ, როგორ ჩნდება ერთპარტიული მმართველობა, რომლის უკანაც დგას ერთი ადამიანი, რომელიც არის ხელშეუხებელი და რუსული ავტოკრატიული მმართველობის აჩრდილი. ამ ყველაფრის უკან დგას რუსეთის აჩრდილი. ამაზე ევროპული პასუხი იყო ზედმეტად ხმადაბალი და ჩუმი

საქართველოს მოსახლეობა მზადაა წინააღმდეგობის გასაწევად. საქართველო არაა შემთხვევითი ქვეყანა, ის არის ევროპის მეზობელი. თუ საქართველო ავტორიტარიზმში ჩაეფლობა, ეს მნიშვნელოვნად შეამცირებს ევროპის პოზიციებს ამ რეგიონში და მიაყენებს ზიანს ევროპის რეპუტაციას. თუ ევრროკავშირი ვერ დაიცავს იმ ღირებულებებს, რომლის შესაქმნელადაც ათწლეულების განმავლობაში მუშაობდნენ, მაშინ ეს ნიშნავს, რომ ევროპის სტრატეგია მხოლოდ ქაღალდზეა და რეალური ძალა არ აქვს. რაც 2008 წელს რუსეთმა ტანკებით ვერ მიაღწია, ახლა დაპყრობას ჰიბრიდული ძალებით ცდილობს. ამას არმია არ სჭირდება, სამი კომპონენტია საჭირო: მანიპულაცია არჩევნებში, დეზინფორმაცია-პროპაგანდა და ოლიგარქი, რომელიც მიიტაცებს სისტემებს. თუ ეს ჰიბრიდული მიდგომა გაამართლებს საქართველოში, ამის გადამრავლება შესაძლებელი გახდება სხვა ქვეყნებშიც.

ევროპამ ნაბიჯები უნდა გადადგას ახლავე, არა სიტყვებით, არამედ საპასუხო სტრატეგიით. ახალი არჩევნები იქნება უსარგებლო თუ არ გვექნება ახალი მკაცრი წესები. ამ მიდგომით არჩევნებს არჩევნებამდე აყალბებენ. საქართველოს მოსახლეობის უდიდესი ნაწილი პროევროპულია. საჭიროა სანქციები მათ წინააღმდეგ ვინც ხელს უწყობს ძალაუფლების მიტაცებას.

დაიცავით ღირებულებები, რომელსაც ხელს უწყობდით მანამდე - მართლმსაჯულება, მედია და სხვა. ჩეხმა ხალხმა იცის რას ნიშნავს ოკუპაცია, პროპაგანდა, თავისუფლების მოპოვება. ჩვენ არ ვითხოვთ, რომ თქვენ იბრძოლოთ ჩვენს  მაგივრად, მაგრამ იდექით ჩვენს გვერდით. თუ საქართველოს ვერ დავიცავთ ახლა, ხვალ შეიძლება ძალიან განსხვავებულ ევროპაში გაგვეღვიძოს," - განაცხადა სალომე ზურაბიშვილმა