ნატო-ს გენერალურმა მდივანმა მარკ რუტემ ბრიუსელში საგარეო საქმეთა მინისტრების დონეზე ჩრდილოატლანტიკური საბჭოს შეხვედრის წინ განაცხადა, რომ რუსეთი დარჩება ალიანსისთვის საფრთხეს მრავალი წლის განმავლობაში, უკრაინასთან სამშვიდობო შეთანხმების შემდეგაც კი.
რუტემ ხაზგასმით აღნიშნა, რომ ალიანსმა უნდა დაგეგმოს, როგორ დაიცვას თავისი ტერიტორია რუსეთისგან, რადგან მისი საფრთხე არ გაქრება.
„2032 წლისთვის აქცენტი არის იმაზე, თუ როგორ დავიცვათ ნატო-ს ტერიტორია რუსეთისგან, ჩვენი გრძელვადიანი საფრთხისგან, რომელიც დარჩება მას შემდეგაც, რაც, იმედი მაქვს, უკრაინაზე შეთანხმება იქნება მიღწეული. რუსული საფრთხე კიდევ მრავალი წლის განმავლობაში იარსებებს“, - განაცხადა მარკ რუტემ.
ნატო-ს გენერალურმა მდივანმა დაადასტურა, რომ შეერთებული შტატები რჩება საიმედო მოკავშირედ ალიანსში.
„თქვენ ნახეთ, რა თქვა თავად პრეზიდენტმა ტრამპმა მე-5 მუხლზე, ნატო-ზე, მის სრულ ერთგულებაზე“, - თქვა რუტემ.
მან დასძინა, რომ იცის ამერიკელების მოლოდინების შესახებ: „ისინი ელიან ევროპელებისგან და კანადელებისგან, რომ მეტი დახარჯონ“ და „ეს საკითხი დღეს დღის წესრიგში დადგება“.
"აშშ-ისგან არის აშკარა მოლოდინი, რომ ჩვენ ნატო-ს ევროპულ ნაწილზე ხარჯებს გავათანაბრებთ იმასთან, რასაც ისინი აკეთებენ [ეს აუცილებელია] რუსული საფრთხის, ჩინეთის ბირთვული იარაღის და რა თქმა უნდა ირანისა და ჩრდილოეთ კორეის გამო", - თქვა მარკ რუტემ.
