თურქეთის პრეზიდენტმა რეჯეფ თაიფ ერდოღანმა და აშშ-ის პრეზიდენტმა დონალდ ტრამპმა სატელეფონო საუბრისას უკრაინაში ომის დასრულების საკითხი განიხილეს. თურქეთის ლიდერი სამშვიდობო ძალისხმევაში საკუთარი წვლილის შეტანას დაჰპირდა. ამის შესახებ თურქეთის პრეზიდენტის ადმინისტრაცია სოციალურ ქსელ X-ზე წერს.
კერძოდ, ერდოღანმა იმედი გამოთქვა, რომ რუსეთ-უკრაინის ომის დასრულებისკენ მიმართული დიპლომატიური ძალისხმევის გააქტიურება დადებით შედეგებს გამოიღებს.
„პრეზიდენტმა ერდოღანმა განაცხადა, რომ თურქეთი კვლავაც შეიტანს წვლილს ამ ძალისხმევაში. მან ასევე ხაზი გაუსვა როგორც უკრაინასთან, ისე რუსეთთან ურთიერთქმედების გააქტიურების მნიშვნელობას“, - ნათქვამია განცხადებაში.
გარდა ამისა, პრეზიდენტებმა საუბრისას ირანში მიმდინარე ომზეც იმსჯელეს. ერდოღანმა ხაზი გაუსვა „ირანსა და აშშ-ს შორის დაძაბულობის განმუხტვისა და პრობლემების დიპლომატიური გზით მოგვარების აუცილებლობას“.
მისი თქმით, თურქეთი მშვიდობის მისაღწევად ძალისხმევას კვლავაც გააგრძელებს.
