ევროკომისიის პრეზიდენტმა ურსულა ფონ დერ ლაიენმა განაცხადა, რომ აშშ-ის პრეზიდენტის დონალდ ტრამპის მიერ გამოცხადებული ახალი ტარიფები სერიოზულად დააზარალებს გლობალურ ეკონომიკას და დასძინა, რომ ევროკავშირი საპასუხო ზომებს ამზადებს.
„პრეზიდენტ ტრამპის განცხადება საყოველთაო ტარიფების შესახებ მთელი მსოფლიოსთვის, მათ შორის ევროკავშირისთვის, სერიოზული დარტყმაა გლობალური ეკონომიკისთვის. ძალიან ვწუხვარ ასეთი არჩევანის გამო. მოდით ვიყოთ გულწრფელები უზარმაზარ შედეგებზე. გლობალური ეკონომიკა მასობრივად დაზარალდება. შედეგები საშინელი იქნება მილიონობით ადამიანისთვის მთელ მსოფლიოში“, - განაცხადა ფორ დერ ლაიენმა.
მისი თქმით, ტარიფები ასევე დააზარალებს მომხმარებლებს მთელ მსოფლიოში და ეს საგრძნობი დაუყოვნებლივ იქნება.
„მილიონობით მოქალაქეს სურსათზე გადასახადები უფრო გაეზრდება, წამლები უფრო ძვირი დაჯდება, ასევე ტრანსპორტი. ინფლაცია გაიზრდება. და ეს განსაკუთრებით მძიმედ დააზარალებს მოსახლეობის ყველაზე დაუცველ ფენებს. ყველა ბიზნესი, დიდი და მცირე, დაზარალდება პირველივე დღიდან“, - განაცხადა ევროკომისიის პრეზიდენტმა.
მან დასძინა, რომ იგი ეთანხმება ტრამპს, რომ სხვა ქვეყნებმა უსამართლოდ ისარგებლეს გლობალური ვაჭრობის წესებით და მზად არის მხარი დაუჭიროს მათ რეფორმირებას, მაგრამ ხაზგასმით აღნიშნა, რომ ტარიფების გამოყენება პრობლემას არ გადაჭრის.
„ამიტომ, თავიდანვე ყოველთვის მზად ვიყავით შეერთებულ შტატებთან მოლაპარაკებებისთვის, რათა მოეხსნათ ტრანსატლანტიკურ ვაჭრობაში დარჩენილი ბარიერი. ამავდროულად, ჩვენ მზად ვართ ვუპასუხოთ. ჩვენ უკვე ვასრულებთ კონტრზომების პირველ პაკეტს ფოლადის ტარიფების საპასუხოდ. ახლა კი ჩვენ ვემზადებით შემდგომი კონტრზომებისთვის, რათა დავიცვათ ჩვენი ინტერესები და ჩვენი ბიზნესი, თუ მოლაპარაკებები ჩაიშლება“, - განაცხადა ფონ დერ ლაიენმა.
მან ხაზგასმით აღნიშნა, რომ „ევროპელები ყოველთვის ხელს შეუწყობენ და დაიცავენ თავიანთ ინტერესებსა და ღირებულებებს“.
"და ჩვენ ყოველთვის დავიცავთ ევროპას. მაგრამ არსებობს ალტერნატიული გზა. პრობლემების მოგვარება მოლაპარაკებების გზით გვიანი არ არის", - განაცხადა ფონ დერ ლაიენმა.
