შინაგან საქმეთა სამინისტროს აკადემიაში პოლიციელთა საბაზისო მომზადების მე-2 და მე-3 ჯგუფის კურსდამთავრებულთა სერტიფიკატებით დაჯილდოების საზეიმო ცერემონია გაიმართა.
ცერემონია ოფიციალურად გახსნა შსს აკადემიის რექტორმა, ლელა ჩიქოვანმა, რომელმაც კურსდამთავრებულებს პროფესიული საქმიანობის დაწყება მიულოცა. მან ხაზი გაუსვა პოლიციელის პროფესიის მნიშვნელობას და წარმატებული კარიერული გზა უსურვა.
40 კურსდამთავრებულისათვის სერტიფიკატების გადაცემის ცერემონიას ესწრებოდნენ შინაგან საქმეთა სამინისტროს ადამიანური რესურსების მართვის დეპარტამენტის დირექტორი, ეკა ზაალიშვილი, საპატრულო პოლიციის დეპარტამენტის დირექტორის მოადგილეები – კახა ბუხრაძე და უშანგი ლომიძე, თბილისის პოლიციის დეპარტამენტის დირექტორის მოადგილე, კახა მურადაშვილი, აკადემიის ინსტრუქტორები, კურსდამთავრებულთა ოჯახის წევრები და ახლობლები.
ღონისძიების ფარგლებში, კურსდამთავრებულებმა წუთიერი დუმილით პატივი მიაგეს სამსახურებრივი მოვალეობის შესრულებისას და საქართველოს ტერიტორიული მთლიანობისთვის დაღუპულ პოლიციელთა ხსოვნას და მემორიალი გვირგვინით შეამკეს.
პოლიციელთა საბაზისო მომზადების სასწავლო პროგრამა თეორიული ცოდნის პრაქტიკული უნარებით გაღრმავებაზეა ორიენტირებული, რომლის მიზანია საპოლიციო დანაყოფებისათვის ახალი კადრების მომზადება, მათთვის საბაზისო ცოდნის მიღება და პოლიციელთათვის პროფესიული საქმიანობის ეფექტურად წარმართვისთვის აუცილებელი უნარ-ჩვევების გამომუშავება.
ინფორმაციას შინაგან საქმეთა სამინისტროს პრესსამსახური ავრცელებს
