"ოპოზიცია იმიტომ არის სუსტი, რომ ყველა კანონი ხელისუფლებაზეა მორგებული. იმისთვის, რომ ოპოზიცია იყოს ძლიერი, სახელმწიფო პოლიტიკა უნდა შეიცვალოს", - განუცხადა "ეროვნულ-დემოკრატიული პარტიის" წარმომადგენელმა, დეპუტატმა გურამ ჩახვაძემ ჟურნალისტებს პრეზიდენტ სააკაშვილის განცხადებაზე კომენტირებისას.
მისივე განმარტებით, ხელისუფლებისგან განსხვავებით ოპოზიციაში არსებობენ ისეთი ადამიანები, რომელთაც მოსახლეობის პრობლემები ნამდვილად აწუხებთ და მათ გადასაჭრელად კონკრეტული გეგმებიც აქვთ.
შეგახსენებთ, რომ საქართველოს პრეზიდენტის შეფასებით, დღევანდელი ოპოზიცია დასუსტებულია, თუმცა ის "პარტიზანული პრინციპებით" მოქმედ იმ ოპოზიციას, რომელიც ქვეყანას გასულ წლებში ჰყავდა, მაინც ურჩევნია. ამის შესახებ მიხეილ სააკაშვილმა ტელეკომპანია "პირველი საინფორმაციო კავკასიურის" პირდაპირ ეთერში ერთ-ერთი მოქალაქის შეკითხვაზე პასუხის გაცემისას განაცხადა.
"ოპოზიციის სისუსტე - ეს არის პრობლემა. ორი-სამი წლის წინ გვყავდა ძალიან ძლიერი ოპოზიცია, მაგრამ იგი ძირითადად დაკავებული იყო ქვეყნისთვის ძირის გამოთხრით და იძახდა: ქვეყანას ავაფეთქებ, თუ ეს ქვეყანა არ იქნება ჩემიო. პარტიზანული პრინციპით მოქმედებდნენ. მე მირჩევნია დღევანდელი სიტუაცია, როცა ოპოზიციონერები დასუსტდნენ. ეს არის უკეთესი სიტუაცია, ვიდრე 2007 წელს, 2008 წელს და თუნდაც 2009 წლის პირველ ნახევარში", - განაცხადა სააკაშვილმა დღევანდელი ტელეხიდის მიმდინარეობისას.
თუმცა ქვეყნის პირველმა პირმა განმარტა, რომ მას მაინც ისეთი ოპოზიცია სურს, რომლის მიერ ხელისუფლების ჩანაცვლება არ იქნება ქვეყნისთვის კატასტროფა.
"ეს არ არის ის სიტუაცია, რომელიც მე მინდა. მე მინდა ისეთი ოპოზიცია, რომელიც იქნება ძლიერი და რომლის მიერ ხელისუფლების ჩანაცვლება არ იქნება ქვეყნისთვის კატასტროფა", - განმარტა სააკაშვილმა.
