ოკუპირებული ცხინვალის ე.წ. საგარეო საქმეთა სამინისტროში კომენტარი გააკეთეს „ერთიანი ნაციონალური მოძრაობის“ საქმიანობის შემსწავლელი კომისიის მუშაობაზე, რომელიც 2008 წლის აგვისტოს ომის მოვლენებს იკვლევს.
„სამხრეთ ოსეთისთვის 2008 წლის აგვისტოს ტრაგედია, რომელსაც მოჰყვა ასობით მშვიდობიანი მოქალაქის, რუსი და ოსი სამშვიდობოების დაღუპვა და ათასობით მოქალაქის ტანჯვა, იყო და რჩება მოუშუშებელ ჭრილობად. ეჭვგარეშეა, რომ სამხედრო აგრესიის გაჩაღებაში დამნაშავე პირები, რომლებმაც სამხრეთ ოსეთში შეჭრის, მშვიდობისმყოფელებზე თავდასხმისა და ოსი ხალხის გენოციდის ბრძანება გასცეს, უნდა დაისაჯონ“, - ნათქვამია ე.წ. საგარეო უწყების განცხადებაში.
სეპარატისტების თქმით, დრო გვიჩვენებს, „როგორ ზუსტად და გამჭვირვალედ მიუდგება დღევანდელი კომისია 2008 წლის აგვისტოს მოვლენებს თავის შეფასებას“.
„მაგრამ ჰეიდი ტალიავინის ხელმძღვანელობით საერთაშორისო კომისიის მუშაობის შედეგები, რომელმაც დაადგინა, რომ საქართველო აგრესორია, აშკარაა.
აშკარაა სამხრეთ ოსეთის ხალხის არჩევანიც: ააშენონ დამოუკიდებელი სახელმწიფო, იბრძოლონ ურთიერთობების ყოვლისმომცველი განმტკიცებისაკენ, რომელიც არის მისი უსაფრთხოების გარანტი რუსეთთან და სხვა მეგობარ ქვეყნებთან. 2008 წლის აგვისტომ ნათლად აჩვენა ვინ არის ოსი ხალხის მეგობარი და ვინ არის მტერი“, - ნათქვამია საოკუპაციო რეჟიმის წარმომადგენელთა განცხადებაში.
