„ქართული ოცნების“ აღმასრულებელი მდივანი მამუკა მდინარაძე სოციალურ ქსელში განცხადებას ავრცელებს, ის ეხმიანება გავრცელებულ მიმოწერის სქრინს, რომელშიც ის მოქალაქეს აგინებს და შეურაცხყოფას აყენებს.

“ბოდიშს ვუხდი საზოგადოებას, ვისაც მოუწია ჩემი და იმ ადამიანის მიმოწერის წაკითხვა, ვინც დაგეგმილი და ორგანიზებული კამპანიის ფარგლებში, ათობით ადამიანიდან ერთ-ერთმა, უსაზიზღრესი სიტყვებით, პირადი მიმოწერის დროს, დაიწყო შეურაცხყოფა და როგორც კი თქვა, რომ გოგო იყო (რისი წარმოდგენაც მის მიერ გამოყენებული სიტყვების გამო აქამდე შეუძლებელი მეგონა:), ბუნებრივია, აღარ გავაგრძელე იმ ფორმით პასუხის გაცემა… საკმაოდ ვრცელი მიმოწერიდან მხოლოდ მცირე მონაკვეთი გაასაჯაროვა და მოიტყუა, რომ თითქოს თავად არ იყო შეურაცხყოფის ინიციატორი. ზოგადად, ასეთი მდარე მანიპულაციებით საზრდოობს ნაცური პიარი… კარგი იქნება ასეთმა ხალხმა გაათვიცნობიეროს, როგორი ფორმით, რაში და რისთვის იყენებენ ანწუხელიძეზე ომის დანაშაულის დამბრალებლი ანტიეროვნული ძალები!“, – დაწერა მამუკა მდინარაძემ.

„ნაციონალური მოძრაობის” ხელისუფლების შემსწავლელი საგამოძიებო კომისიის“, პარალელურად, სადაც კომისიის წევრები 2008 წლის აგვისტოს ომის საკითხებზე ომის მონაწილეებს და მაშინდელი ხელისუფლების წევრებს კითხავდნენ, 28 მარტს პარლამენტთან აქცია გაიმართა. აქციაზე ორი აქტივისტი თაკო კურატიშვილი და ლილუ შაველაშვილი დააკავეს.

ამის შემდეგ ერთ-ერთმა მოქალაქემ, ანა ყაულაშვილმა მამუკა მდინარაძესთან მიმოწერის სქრინი გაავრცელა. სქრინზე ჩანს, როგორ აგინებს მდინარაძე მოქალაქეს და ანა ყაულაშვილიც შეურაცხყოფით პასუხობს მას. ანა ყაულაშვილი წერს: „მამუკა მდინარაძე ჩატებში ყრის ჩვენს მიმოწერას, იმან დამიწყო პირველმაო [შეურაცხყოფა]. ჰო, მე დაგიწყე, აბა, შენ ხომ არ დამიწყებდი გინებას ასე ჰაერზე? შენი მეგობარი დავაჭერინე ასე უმიზეზოდ? ქვეყანა გავყიდე? თუ რუსებს ვემონები, შენ რომ მოგეწერა პირველს?

გაგიკვირდება, მაგრამ რიგით ანას არც თმენის ვალდებულება აქვს და არც იმის, ჩატის სქრინს რომ დებს, თავიდან ბოლომდე დადოს“, - დაწერა ყაულაშვილმა.