სერბეთის დედაქალაქ ბელგრადში BMW-ის მარკის ავტომობილი საპროტესტო აქციის დროს ხალხში შევარდა. დაშავდა სამი ადამიანი, რომლებიც მსუბუქი დაზიანებებით საავადმყოფოში გადაიყვანეს. მძღოლმა გაქცევა სცადა, თუმცა პოლიციამ დააკავა. მან წინააღმდეგობა გაუწია დაკავებას.
ინციდენტის ამსახველი ვიდეომასალა ინტერნეტში ვრცელდება. კადრებში ჩანს, რომ მძღოლი მოძრაობს ხალხში, როდესაც ისინი ქუჩაში გადაადგილდებოდნენ და შემდეგ შემთხვევის ადგილის დატოვებას ცდილობს.
სერბეთში მასობრივი საპროტესტო გამოსვლები 2024 წლის შემოდგომიდან გრძელდება. აქციები დაიწყო ნოვი-სადში მომხდარი ტრაგედიის შემდეგ, სადაც რკინიგზის სადგურზე სახურავის ჩამონგრევის შედეგად 15 ადამიანი დაიღუპა.
აქციის მონაწილეები დამნაშავეების დასჯას და ქვეყნის ხელმძღვანელობის, მათ შორის პრეზიდენტის, ალექსანდრ ვუჩიჩის გადადგომას ითხოვენ.
2025 წლის იანვარში საპროტესტო აქციების ფონზე, სერბეთის პრემიერ-მინისტრი მილოშ ვუჩევიჩი გადადგა.
