დიდი ბრიტანეთის პრემიერ-მინისტრმა კირ სტარმერმა პარიზში უკრაინის შესახებ საგანგებო სამიტის შემდეგ განაცხადა, რომ მომავალ კვირას აშშ-ში გაემგზავრება, რათა განიხილოს „გრძელვადიანი მშვიდობის ძირითადი ელემენტები“ აშშ-ის პრეზიდენტ დონალდ ტრამპთან.
სტარმერმა თქვა, რომ უახლოეს დღეებში ის ასევე ისაუბრებს უკრაინის პრეზიდენტთან ვოლოდიმირ ზელენსკისთან და ამის შემდეგ ევროპელი ლიდერები ახალ შეხვედრას გამართავენ.
ორშაბათს პარიზის სამიტის შემდეგ გადაწყვეტილებები არ გამოცხადებულა. ევროპელი ლიდერები განიხილავენ რა უნდა გააკეთონ ტრამპის ადმინისტრაციის გეგმასთან დაკავშირებით მოსკოვთან ევროპის მონაწილეობის გარეშე მოლაპარაკებების შესახებ.
”ჩვენ პროცესის ჯერ კიდევ ძალიან ადრეულ ეტაპზე ვართ ”, - განუცხადა სტარმერმა ჟურნალისტებს.
მან ხაზგასმით აღნიშნა, რომ ნებისმიერი სამშვიდობო შეთანხმება უნდა იყოს გარანტირებული შეერთებული შტატების მიერ.
„აშშ-ის უსაფრთხოების გარანტიები ერთადერთი ეფექტური გზაა უკრაინაზე რუსეთის ხელახლა თავდასხმის თავიდან ასაცილებლად“, - განაცხადა ბრიტანეთის პრემიერმა.
