შეერთებული შტატები ორმხრივი მოლაპარაკებების გამართვას აპირებს: ჯერ რუსეთთან და უკრაინასთან, შემდეგ კი ერთობლივად. იუწყება NBC News
გამოცემა აღნიშნავს, რომ ორმა ამერიკელმა ოფიციალურმა პირმა დაადასტურა, რომ უკრაინა არ მიუწვევიათ საუდის არაბეთში მოლაპარაკებებზე, მაგრამ განაცხადეს, რომ აშშ აპირებს ორმხრივ შეხვედრას რუსეთთან, შემდეგ ორმხრივ შეხვედრას უკრაინასთან. ამის შემდეგ კი ერთობლივი მოლაპარაკებების წარმოებას.
„ეს ყველაფერი გვაფიქრებინებს, რომ ორივესთან [რუსეთთან და უკრაინასთან] თანაბარი წონით ვიმუშაოთ. ჩვენ გვსურს მკვლელობების შეჩერება და გრძელვადიანი მშვიდობისკენ წინ წაწევა,“ - განაცხადა ამერიკელმა ოფიციალურმა პირმა.
გასული კვირის ბოლოს გავრცელდა ინფორმაცია, რომ ტრამპის ადმინისტრაციის მაღალჩინოსნები მიემგზავრებიან საუდის არაბეთში რუსეთისა და უკრაინის წარმომადგენლებთან სამშვიდობო მოლაპარაკებების დასაწყებად.
Axios-ის ცნობით, აშშ-ისა და რუსეთის მაღალჩინოსნების შეხვედრა უკრაინაში ომის დასრულების შესაძლო შეთანხმების განსახილველად სამშაბათს, 18 თებერვალს, საუდის არაბეთში გაიმართება.
