ევროსაბჭოს საპარლამენტო ასამბლეიდან ივანიშვილის დელეგაციის წევრების მიმართ ამოქმედდება სანქციები, რომლებიც მათ კომიტეტებში წევრობის ან მონაწილეობის უფლებას უკრძალავს, – ამის შესახებ „ერთიანობა ნაციონალური მოძრაობის“ თავმჯდომარემ, თინა ბოკუჩავამ განაცხადა.
„დღეს ევროსაბჭოს საპარლამენტო ასამბლეამ პლენარულ სხდომაზე კენჭი უნდა უყაროს რეზოლუციას, რომელიც მონიტორინგის კომიტეტმა მიიღო, სადაც გრძელდება სასანქციო პოლიტიკა ივანიშვილის რეჟიმის წინააღმდეგ. ეროვნული სანქციების შემდეგ ახლა უკვე ამოქმედდება სანქციები ევროსაბჭოს საპარლამენტო ასამბლეიდან, სადაც ივანიშვილის დელეგაციის წევრებს არ ექნებათ კომიტეტებში წევრობის ან მონაწილეობის უფლება. მათ მხოლოდ ფორმალურად უნარჩუნდებათ აპრილამდე უფლებამოსილება ერთადერთი მიზნით, რომ ქვეყანაში ჩაინიშნოს ახალი, თავისუფალი, სამართლიანი საპარლამენტო არჩევნები, რომელიც ასახავს ქართველი ხალხის თავისუფალ ნებას. ეს არის ძალიან დიდი მიღწევა და წარმატება ქართული დემოკრატიისთვის, ივანიშვილის რეჟიმის საერთაშორისო არაღიარებისთვის, სასანქციო პოლიტიკისთვის. ასევე, იმ საბოლოო მიზნისთვის, რომელიც დღეს აერთიანებს ქართულ საზოგადოებას, პოლიტპატიმრების გათავისუფლების, დამნაშავეების დასჯის და ახალი სამართლიანი საპარლამენტო არჩევნების ჩანიშვნის სახით“, – განაცხადა თინა ბოკუჩავამ.
