ზურაბ ნოღაიდელს სასამართლოში უჩივიან. ამ გზით ექს-პრემიერთან დაპირისპირებული გუნდი ფინანსური დავალიანებების ამოღებას შეეცდება. ნოღაიდელის მოწინააღმდეგეები ექს-თავმჯდომარის ფინანსური დოკუმენტაციის გადმოწმებას ითხოვენ.
სარჩელი მოძრაობა "სამართლიანი საქართველოსთვის" ახალმა ლიდერმა სერგო ჯავახიძემ თანამოაზრეებთან ერთად მოამზადა და ის სასამართლოში დღეს შევა. მოძრაობა "სამართლიანი საქართველოსთვის" წევრები ამბობენ, რომ მოთხოვნის მიუხედავად ნოღაიდელმა მათ ფინანსური დოკუმენტაცია არ მისცა. ამიტომ ყოფილ პრემიერთან დაპირისპირებული გუნდი ფიქრობს, რომ "სამართლიანი საქართველოს" ექს-ლიდერს ფინანსური დარღვევების აღმოჩენის ეშინია.
შეგახსენებთ, რომ რიგგარეშე ყრილობა, სადაც ნოღაიდელი თავმჯდომარის პოსტიდან ოფიციალურად გადააყენეს სწორედ ვალების გამო ჩატარდა. მოძრაობის წევრები, ნოღაიდელს თვეობით დაგროვილი ხელფასების გასტუმრებას სთხოვენ.
მასალის გამოყენების პირობები
