ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს მტკიცებით, სააღსრულებლო ბიუროს ყოფილი შენობიდან დევნილთა განსახლება საერთაშორისო ორგანიზაციებთან შეთანხმებული პროცედურების დაცვით მიმდინარეობს.
"ვაჟა-ფშაველას მე-3 კვატალში მდებარე სააღსრულებლო ბიუროს ყოფილი შენობა, სადაც დევნილები 2008 წლის მოვლენების შემდეგ ცხოვრობდნენ, არ წარმოადგენს კომპაქტურად ჩასახლებულ ობიექტს. ის დევნილთა დროებითი თავშესაფარი იყო. დევნილთა განსახლების პროცესი მიმდინარეობს იმ პროცედურების დაცვით, რაც შეთანხმებულია საერთაშორისო ორგანიზაციებთან", - ნათქვამია სამინისტროს განცხადებაში და აღნიშნულია, რომ სამინისტრო დევნილებს რეგიონებში საკუთრებაში გარემონტებულ ბინებს სთავაზობს.
"ბინის გარეშე არავინ დარჩება. გავრცელებული იმფორმაციით, მხოლოდ ორ ოჯახს შესთავაზეს ბინა წინწყაროში, რაც სიმართლეს არ შეეფება. ალტერნატიული ფართის შეთავაზება არა ორმა, არამედ ყველა ოჯახმა მიიღო", - აღნიშნულია განცხადებაში.
შეგახსენებთ, რომ სააღსრულებლო ბიუროს ყოფილი შენობიდან დევნილების გამოსახლება დღეს დილით დაიწყო. აღნიშნულის გარდა იძულებით გადაადგილებული პირების გამოყვანა კიდევ ორი ობიექტიდან ხდება.
