ევროპარლამენტის მიერ მიღებულ რეზოლუციას ლიტვის ელჩი მიესალმება. იონას პასლაუსკასი ტერმინ "ოკუპაციის" გამოყენებას მნიშვნელოვან ფაქტად მიიჩნევს. იგი სხვა სახელმწიფოებსაც მოუწოდებს აიღონ მაგალითი საქართველოს მიმართებით სწორი ტერმინოლოგიის დამკვიდრებაში.
ლიტვის ელჩის განცხადებით ტერმინი "ოკუპაციის" გავრცელება საქართველოს ტერიტორიული მთლიანობისა და სუვერენიტეტის აღდგენას ასევე ევროინტეგრაციის პროცესს შეუწყობს ხელს.
პასლაუსკასმა ამის შესახებ სპეციალურ მიღებაზე განაცხადა, რომელიც ლიტვისათვის ნატოსთან საკონტაქტო ფუნქციების მინიჭების აღსანიშნავად გაიმართა. მომავალი ორი წლის განმავლობაში საქართველოსა და ალიანსს შორის შუამავლის როლს ლიტვის საელჩო შეასრულებს.
"მე არ მინახავს რეზოლუციის ზუსტი ტექსტი, მაგრამ ჩემთვის ტერმინი "ოკუპაცია" სიურპრიზი არ არის. ლიტვის პარლამენტმა ამ ტერმინის გამოყენებით რეზოლუცია რამდენიმე ხნის წინ მიიღო. ეს ნიშნავს, რომ ლიტვის პარლამენტი არის ერთ-ერთი პირველი რომელმაც სწორი ტერმინი გამოიყენა თქვენს კონფლიქტებთან მიმართებაში.
არა მარტო ევროპარლამენტის არამედ ევროპის საკონსულოსა და სხვა პარტნიორი ქვეყნების მიერ მიღებულ დოკუმენტებშიც ჩაიწერა ეს სიტყვა, რაც მისასალმებელია.
ტერმინი "ოკუპაცია" ვრცელდება და ეს ნიშნავს, რომ ვრცელდება სიმართლე ამ ტერიტორიების შესახებ", _ განაცხადა ლიტვის ელჩმა საქართველოში იონას პასლაუსკასმა.
