ნუ წვალობთ, ჩემო მეგობრებო, აუცილებლად მოვა ახალი წელი, თბილისი იქნება ულამაზესი და ყველაფერი იქნება ძალიან მაგრად, - ამის შესახებ თბილისის მერმა, კახა კალაძემ ვიდეომიმართვისას განაცხადა.
„ხვალ საღამოს 7 საათზე აინთება დედაქალაქის მთავარი ნაძვის ხე. თბილისი კვლავ იქნება აუცილებლად გამორჩეული, სადღესასწაულოდ მორთული ქალაქი. არავის არ აქვს უფლება, რომ დიდს თუ პატარას წაართვას ის ბედნიერება, რაც მოაქვთ საახალწლოდ მორთულ ქუჩებს. ხვალ აინთება მთავარი ნაძვის ხე და დაიწყება საზეიმო დღეები, გპირდებით ბევრ სადღესასწაულო ღონისძიებას.
რაც შეეხება მცდელობას, ჩაიშალოს დღესასწაული, არ მისცენ პატარებს გართობის შესაძლებლობა, მცირე მეწარმეებს აუკრძალონ თავიანთი პროდუქციის გაყიდვა, მუსიკოსებს კონცერტების გამართვა და საერთოდაც, გააუქმონ ახალი წელი - მინდა ვუთხრა მათ, ნუ წვალობთ, ჩემო მეგობრებო, აუცილებლად მოვა ახალი წელი, თბილისი იქნება ულამაზესი და ყველაფერი იქნება ძალიან მაგრად.
[...] რაც ზოგადად ნაძვის ხის ანთების ღონისძიებას, იქნება სადღესასწაულო განწყობა, იქნება ზეიმი, იქნება სრულად უსაფრთხო გარემო, რასაც შესაბამისი უწყებები გააკონტროლებენ. სახელმწიფო დღეს არის ძლიერი, სახელმწიფო ინსტიტუტები არის ძლიერი და ვითარება სრულად კონტროლდება", - განაცხადა კახა კალაძემ.
