სამხრეთ კორეის თავდაცვის ყოფილმა მინისტრმა, კიმ იონ ჰიუნმა წინასწარი მოთავსების იზოლატორში თვითმკვლელობა სცადა.
დაწესებულების ხელმძღვანელმა შინ იონ ჰემ განაცხადა, რომ ყოფილი მინისტრის მდგომარეობა საშიში არ არის. მისი თქმით, წინასწარი დაკავების ცენტრის ოფიცერი სწრაფად ჩაერია სიტუაციაში.
”სამედიცინო შემოწმების შედეგები აჩვენებს, რომ პატიმრის ჯანმრთელობა დამაკმაყოფილებელია, ყოველგვარი დარღვევების გარეშე”, - ნათქვამია სამხრეთ კორეის იუსტიციის სამინისტროს განცხადებაში. იუწყება AFP.
ინციდენტი სამშაბათს საღამოს მოხდა, სანამ სეულის სასამართლო ყოფილ მინისტრის ოფიციალურად დააკავებდა ამბოხში მონაწილეობის ბრალდებით.
გამოძიების თანახმად, კიმ იონ ჰიონმა სამხრეთ კორეის პრეზიდენტს იუნ სოკ იოლს ქვეყანაში საომარი მდგომარეობის გამოცხადება შესთავაზა და პარლამენტის შენობაში სამხედროების განლაგების ბრძანება გასცა.
იუნ სოკ-იოლმა საომარი მდგომარეობა 3 დეკემბერს გამოაცხადა. პარლამენტმა გადაწყვეტილებას მხარი არ დაუჭირა, რის შემდეგაც პრეზიდენტი იძულებული გახდა გაეუქმებინა იგი.
ამის შემდეგ თავდაცვის მინისტრმა თანამდებობა დატოვა და გამოძიება დაიწყო.
საქმეში თავად პრეზიდენტიც ფიგურირებს, მას ქვეყნიდან გასვლა ეკრძალება. პოლიციამ მის რეზიდენციაშიც ჩხრეკა ჩაატარა.
კიმ იონ-ჰიონმა, რომელიც რამდენიმე დღის წინ დააკავეს, ბოდიში მოიხადა და ადვოკატების მეშვეობით განაცხადა, რომ შექმნილ ვითარებაზე მთელი პასუხისმგებლობა მხოლოდ მას ეკისრებოდა.
