დღეს მთავრობის კანცელარიაში ვიცე პრემიერ-მინისტრ გიორგი ბარამიძის თავმჯდომარეობით საქართველოს ნატო-ში ინტეგრაციის კოორდინაციის სახელმწიფო კომისიის სხდომა გაიმართება.
დღევანდელ სხდომაზე ოფიციალურად განიხილება და დამტკიცდება 2011 წლის წლიური ეროვნული პროგრამის (ANP) პროექტი, რომელიც არის უწყებათაშორისი რამდენიმეთვიანი კოორდინირებული მუშაობის შედეგი და მოიცავს რეფორმების გეგმებს პოლიტიკურ, ეკონომიკურ, თავდაცვისა და უსაფრთხოების, სამართლებრივ, განათლებისა და სხვა საკითხებში.
სახელმწიფო კომისიის მუშაობაში მონაწილეობას იღებს წლიური ეროვნული პროგრამის (ANP) განხორციელების პროცესში ჩართული ყველა სახელმწიფო უწყების წარმომადგენელი.
სახელმწიფო კომისიის მიერ დოკუმენტის დამტკიცების შემდეგ იგი ნატო-ს შტაბ-ბინაში შემდგომი განხილვისა და შესაბამისი პროცედურების განხორციელების მიზნით გაიგზავნება.
წლიური ეროვნული პროგრამა (ANP), ნატო-საქართველოს კომისიასთან ერთად ჩრდილოატლანტიკურ ალიანსში საქართველოს გაწევრიანების მთავარ ინსტრუმენტს წარმოადგენს. 2009-2010 წლების წლიური ეროვნული პროგრამები ნატოს მიერ დადებითად იქნა შეფასებული. 2011 წელი პროგრამის განხორციელების მესამე ფაზას წარმოადგენს.
