"მსოფლიოში თავისუფლების მხრივ ვითარება ზედიზედ მეხუთე წელია უარესდება" - ასეთ დასკვნამდე ავტორიტეტული უფლებადამცავი ორგანიზაცია "ფრიდომ ჰაუსი" მიდის, რომელმაც მსოფლიოში თავისუფლების შესახებ წლიური ანგარიში გამოაქვეყნა.
"მსოფლიოს მრავალ ქვეყანაში ავტორიტარული რეჟიმები სულ უფრო აძლიერებენ თავისუფლების შეზღუდვას", - ნათქვამია ანგარიშში, სახელწოდებით "თავისუფლება მსოფლიოში 2011".
აღსანიშნავია, რომ ანგარიშში ამ კუთხით მსოფლიოს 194 ქვეყანაში და 14 ტერიტორიაზე არსებული ვითარებაა შეფასებული, მათ შორის საქართველოს კონფლიქტური რეგიონები _ აფხაზეთი და ცხინვალის რეგიონიც მოხვდა, რომელთაგან პირველს ნაწილობრივ თავისუფალი, ე.წ. სამხრეთ ოსეთს კი არათავისუფალი ტერიტორიის სტატუსი აქვს მინიჭებული.
კვლევის მიხედვით, 2010 წელს 25 ქვეყანაში თავისუფლების კუთხით უკუსვლა დაფიქსირდა, რის გამოც თავისუფლის სტატუსი ორ სახელმწიფოს "ჩამოერთვა" და ის 85-მდე შემცირდა. ორგანიზაციამ აღნიშნული სტატუსი უკრაინას და მექსიკას ჩამოართვა და ისინი ნაწილობრივ თავისუფალი ქვეყნების რიგებში განათავსა.
"უკრაინა (ბალტიისპირეთის სახელმწიფოების გარდა) საბჭოთა კავშირის ქვეყნებიდან ერთადერთი იყო, რომელიც თავისუფალ ქვეყნად იყო შეფასებული - ერთადერთი ამ რეგიონში. მაგრამ გასული წლის პროცესების შემდეგ, ახლა უკრაინა ნაწილობრივ თავისუფლად არის შეფასებული და შეგვიძლია ვთქვათ, რომ ცალკეული ქვეყნისთვის ეს არის 2010 წლის ყველაზე მნიშვნელოვანი და გულდასაწყვეტი გაუარესება", - აცხადებს "ფრიდომ ჰაუსის" კვლევითი განყოფილების დირექტორი არჩ პუდინგტონი.
რაც შეეხება უშუალოდ საქართველოს, "ფრიდომ ჰაუსის" შეფასებით, თავისუფლების მხრივ გარკვეული გაუმჯობესება შეინიშნება, თუმცა საქართველო ჯერ კიდევ ნაწილობრივ თავისუფალ სახელმწიფოთა ჩამონათვალს მიეკუთვნება.
"საქართველოში გარკვეული გაუმჯობესებები აღინიშნება. მაგალითად, გამოსწორდა საშინაო-პოლიტიკური ვითარება, რომელიც 2008 წლის ინტერვენციის შემდეგ მნიშვნელოვნად იყო გაუარესებული", - აღნიშნავს რადიო "თავისუფლებასთან" საუბარში "ფრიდმო ჰაუსის" სამეცნიერო განყოფილების უფროსი ქრისტორფერ უოკერი.
აღსანიშნავია, რომ თავისუფლების დონე ორგანიზაციის შეფასებით გარკვეულწილად გაუმჯობესდა ყოფილ საბჭოთა რესპუბლიკის კიდევ ორ ქვეყანაში - ყირგიზეთსა და მოლდავეთში. მათგან განსხვავებით, გაუარესების ტენდენცია შეინიშნება ბელორუსიაში და რუსეთში. რუსეთში - ჩინეთთან, ეგვიპტესთან, ირანთან და ვენესუელასთან ერთად - "ფრიდომ ჰაუსის" შეფასებით, ძლიერდება რეპრესიული, თავისუფლების შეზღუდვისაკენ მიმართული ზომები.
თავისუფლების ყველაზე დაბალი ხარისხის მქონე რეგიონებად კი ანგარიშში სახელდება ახლო აღმოსავლეთი და ჩრდილოეთი აფრიკა.
შეგახსენებთ, რომ ორგანიზაცია "ფრიდომ ჰაუსი" ამერიკის შეერთებულ შტატებში 1972 წეოლს დაფუძვნდა და იქედან მოყოლებული ყოველწლიურ მიმოხილვებში ასახავს ვითარებას მსოფლიოში ადამიანების თავისუფლების კუთხით. საამისოდ ის აგროვებს ინფორმაციას ისეთ ფაქტორებზე, როგორიცაა გამოხატვის თავისუფლება, პოლიტიკური პლურალიზმი, შეკრების თავისუფლება და თითოეულ ქვეყანას მიუჩენს სტატუსს: მას თავისუფლად, ნაწილობრივ თავისუფლად, ან არათავისუფლად მიიჩნევს.
