რუსეთსა და აფხაზეთისა და ცხინვალის რეგიონის საოკუპაციო რეჟიმებს შორის ე.წ. კაპიტალდაბანდებების ურთიერთწახალისებისა და დაცვის შესახებ ხელშეკრულებების რატიფიცირების საკითხს საგარეო უწყება გამოეხმაურა
2010 წლის 8 და 23 დეკემბერს რუსეთის პრეზიდენტმა მედვედევმა ხელი მოაწერა რუსეთის ფედერაციის ფედერალურ კანონებს რუსეთის ფედერაციასა და საქართველოს ოკუპირებულ ტერიტორიებზე მის მიერვე შექმნილ მარიონეტულ რეჟიმებს შორის გაფორმებული ე.წ. კაპიტალდაბანდებების (ინვესტიციების) ურთიერთწახალისებისა და დაცვის შესახებ შეთანხმებების რატიფიცირების თაობაზე. ამის შესახებ საქართველოს საგარეო საქმეთა სამინისტრომ ოფიციალური განცხადება გაავრცელა.
საგარეო საქმეთა სამინისტრო აცხადებს, რომ საერთაშორისო-სამართლებრივი თვალსაზრისით ოკუპანტ ქვეყანასა და მის მიერვე შექმნილ მარიონეტულ რეჟიმებს შორის დადებული ნებისმიერი ე.წ. ხელშეკრულება ბათილია და იურიდიული ძალის არმქონე, ვინაიდან ე.წ. სამხრეთ ოსეთი და აფხაზეთი არ წარმოადგენენ საერთაშორისო სამართლის სუბიექტებს, და ეს ტერიტორიები საყოველთაოდ აღიარებულია როგორც საქართველოს განუყოფელი ნაწილი.
"ამავე დროს, ხელშეკრულებების ტექსტიდან, თანდართული განმარტებითი ბარათებიდან და დასკვნებიდან გამომდინარე, რუსეთი პრაქტიკულად აღიარებს, რომ ნაკისრი საერთაშორისო ვალდებულებების დარღვევით და საქართველოს სუვერენიტეტის იგნორირებით, 90-იანი წლებიდან ახორციელებდა უკანონო ეკონომიკურ საქმიანობას ე.წ. კონფლიქტურ ზონებში და ამყარებდა ურთიერთობებს იქ არსებულ მარიონეტულ რეჟიმებთან როგორც დამოუკიდებელ ერთეულებთან. შესაბამისად, როგორც არაერთხელ განაცხადა ქართულმა მხარემ, რუსეთის ოფიციალური პირების მტკიცებები, რომ ისინი პატივს სცემდნენ საქართველოს სუვერენიტეტსა და ტერიტორიულ მთლიანობას და მხოლოდ 2008 წლის აგვისტოში გახდნენ „იძულებული" ეღიარებინათ ე.წ. აფხაზეთისა და სამხრეთ ოსეთის რესპუბლიკების დამოუკიდებლობა, იყო საერთაშორისო და თვით რუსეთის საზოგადოებრიობის მოტყუებისა და საკუთარი ვირტუალური ე.წ. ახალი რეალობის ლეგიტიმაციის მცდელობა", - განმარტავს ვაშაძის უწყება.
სამინისტროს რწმუნებით, ყოველივე ზემოაღნიშნული კიდევ ერთხელ ადასტურებს, რომ 1990-იანი წლებიდან მოყოლებული რუსეთის ფედერაცია თანმიმდევრულად და გეგმაზომიერად ახორციელებდა საქართველოს სახელმწიფოებრიობის განადგურების, მისი განუყოფელი ნაწილების მიტაცებისა და ანექსიის, მრავალჯერადი ეთნიკური წმენდის პოლიტიკას, რომელიც 2008 წელს დაგვირგვინდა სრულმაშტაბიანი სამხედრო აგრესიით და საქართველოს განუყოფელი ნაწილების ოკუპაციით.
