ნებისმიერ ევროპულ ქვეყანაში, პარტია, რომელიც გაიმარჯვებს, დაუპირისპირდებოდა იმ პოლიტიკურ ძალას, რომელმაც ქვეყანა ჩააგდო ნაწილობრივ ოკუპაციაში, სტრატეგიული ობიექტები გასცა და ქვეყნის წინაშე დანაშაული ჩაიდინა, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.
„არ არსებობს არც ერთი ევროპული ქვეყანა და პიტერ სტანოს ჰკითხეთ თუ არსებობს, რომელიც არ მოსთხოვს პასუხს იმ ხელისუფლებას, რომელიც დღეს კიდევ იმუქრება, რომ ქვეყანაში დესტაბილიზაცია უნდა მოხდეს. არც ერთი ევროპული ქვეყანა ამას არ შეარჩენს არც ერთ პოლიტიკურ ძალას. რასაკვირველია, ეს არ ნიშნავს იმას, რომ კონკრეტულ ადამიანებს და მასობრივად ყველას რაღაც პასუხისმგებლობა მოუწევთ, მაგრამ ერთხელ და სამუდამოდ საქართველოს ისტორიისთვის მაინც უნდა ითქვას, რა დანაშაულია ჩადენილი, ეს დანაშაული რაში მდგომარეობს და რატომ არ აქვს ამა თუ იმ პარტიას ხელისუფლებაში მოსვლის პერსპექტივა. ეს ჩვეულებრივი სამართლებრივი სტანდარტია, როდესაც ადამიანს საერთოდ უნდა აეკრძალოს პოლიტიკასთან გაკარება, თუ ქვეყნისთვის ისეთი ზარალი აქვს მიყენებული, როგორიცაა ადამიანური მსხვერპლი და ტერიტორიების ოკუპაცია“, – პირველი არხის ცნობით, განაცხადა ვოლსკიმ.
გამოცემა Politico-ს ცნობით, ევროკავშირი აფრთხილებს საქართველოს მთავრობას, არ გააუქმოს ოპოზიციური პარტიები.
გამოცემა აღნიშნავს, რომ ევროკავშირში აცხადებენ, რომ საქართველოს მთავრობა თუ განახორციელებს გეგმას და არჩევნებში გამარჯვების შემდეგ ოპოზიციურ პარტიებს აკრძალავს, ეს გაანადგურებს იმას, რაც საქართველოს დემოკრატიისგან დარჩა, ასევე, ამას მოჰყვება მკაცრი პასუხი დასავლეთისგან.
"ყველა ვარიანტი მაგიდაზეა და ჩვენ შესაბამისად ვიმოქმედებეთ, თუ ეს განცხადებები განხორციელდება“, – თქვა ევროკავშირის საგარეო პოლიტიკური უწყების პრესსპიკერმა, პიტერ სტანომ.
