თუ რუსეთში გინდათ წასვლა, წადით და ამ ქვეყანას დაანებეთ თავი! - „ქართული ოცნება“ თავისი ტროლ-ბოტებით წარსულს უნდა ჩავაბაროთ, - ამის შესახებ "ერთიანობა- ნაციონალური მოძრაობის" ერთ-ერთმა ლიდერმა, გიორგი ვაშაძემ განაცხადა.
ვაშაძე გამოეხმაურა Meta-ს გადაწყვეტილებას, პლატფორმებიდან სამხრეთ კავკასიაში მოქმედი რუსული ქსელების წაშლის შესახებ. .
მისი თქმით, „ქართული ოცნება“ ქვეყანაში რეალური პრობლემების მოგვარების მაგივრად, რუსეთის მხარდაჭერით საქართველოში ცრუ ინფორმაციას ავრცელებს.
„წარმოუდგენელ რეალობაში ვცხოვრობთ, მთავრობა რომელიც დასაქმებაზე, ფასების დაწევაზე, ემიგრაციისა და შობადობის უმძიმეს პრობლემაზე უნდა ზრუნავდეს, თურმე რით არის დაკავებული. გუშინ 76 „ფეისბუქ“ ანგარიში, 30 „ფეისბუქ“ გვერდი და 11 „ინსტაგრამ“ ანგარიში წაიშალა, რომელიც რუსეთიდან იმართებოდა, „რუსული კანონის“ მხარდასაჭერად. ანუ „ქართული ოცნების“ პროპაგანდის მხარდასაჭერად რუსეთში შექმნილია მთელი სისტემები, რომლებიც მათ ეხმარებიან ყალბი ინფორმაციის საქართველოში გასავრცელებლად. 77 ათასი დოლარია დახარჯული ამ კონკრეტულ სიტუაციაში, რუსეთიდან იმისთვის, რომ „ქართულ ოცნებას“ სიყალბის გავრცელებაში დაეხმარონ. იმ სიცრუის ტირაჟი ხომ აღარ გყოფნით რასაც აქ აკეთებთ, ტროლებისა და ბოტების ქარხანა გაქვთ აწყობილი და ყალბ რეალობას ქმნით საქართველოში. ესეც არ გყოფნით და ახლა მხარდასაჭერად რუსები გამოიძახეთ, რომ ცრუ ინფორმაცია მიაწოდოთ ხალხს? ეს არის თქვენი სახე? ეს არის ხალხზე ზრუნვა? რატომ არ გადიხართ ქუჩაში, რომ ადამიანებს ჰკითხოთ თუ სად არის რეალურად პრობლემა?
რამდენი მტკიცებულება უნდა ავიღოთ, თქვენი რუსეთთან კავშირების დასამტკიცებლად. პირდაპირ სახელმძღვანელოებს იღებთ რუსეთის სამსახურებისგან. მტრად აცხადებთ ევროპასა და ამერიკას, შეაჩერეთ ევროკავშირში ინტეგრაციის პროცესი, მძიმე დარტყმა მიაყენეთ საქართველოს ევროპულ პერსპექტივას და აქეთ თურმე ყალბი ანგარიშები გაქვთ რუსეთში და იქიდან ხარჯავთ საქართველოში ფულს, რომ ადამიანები შეცდომაში შეიყვანოთ და რეალობა გააყალბოთ. ვფიქრობ, რომ 26 ოქტომბერი ამ სიყალბის დასრულების დღეა და საქართველომ უნდა დაიწყოს ევროკავშირისკენ განვითარება, ამისთვის წინსვლა და ერთიანობა გვჭირდება, ინვესტიციების მოზიდვა, ის 14 მილიარდი ევრო რასაც ევროპელები გვთავაზობენ უნდა მოვიტანოთ, რომ წავიდეთ წინ. „ქართული ოცნება“ თავისი ტროლ-ბოტებით წარსულს უნდა ჩავაბაროთ! თუ რუსეთში გინდათ წასვლა წადით და ამ ქვეყანას დაანებეთ თავი!“ - განაცხადა გიორგი ვაშაძემ.
შეგახსენებთ, Meta ახალ ანგარიშში წერს, რომ კოორდინირებული არაავთენტური ქცევისთვის წაიშალა 76 ფეისბუქანგარიში, 30 ფეისბუქგვერდი და 11 ინსტაგრამანგარიში. მათივე განცხადებით, ეს ქსელი რუსული წარმოშობისაა და მისი სამიზნე საქართველო, სომხეთი და აზერბაიჯანია.
Meta-ს ცნობით, საქართველოში ეს გვერდები და ანგარიშები ბოლო პერიოდში რუსულ კანონთან დაკავშირებით გამართული დემონსტრაციების საწინააღმდეგო პოსტებს ავრცელებდნენ. მიზანმიმართული კამპანიის ფარგლებში, ისინი დემონსტრანტებს აკრიტიკებდნენ, ხოლო მმართველ "ქართული ოცნების" პარტიას უჭერდნენ მხარს.
