რუსული საოკუპაციო ჯარი, რომელიც აფხაზეთის ტერიტორიას აკონტროლებს ამ რეგიონში არ უშვებს არასწორი ეთნიკური წარმომავლობის მოქალაქეებს, მათაც კი ვინც ამ რეგიონში კონფლიქტამდე ცხოვრობდა. ეს განცხადება საქართველოს პრეზიდენტმა მიხეილ სააკაშვილმა უკრაინული 5 არხისათვის მიცემულ ინტერვიუში გააკეთა.
მიხეილ სააკაშვილმა რუსეთის ასეთ ქმედებებს ბერლინის ახალი კედლის აგება უწოდა.
"აფხაზეთში მოსახლეობის 20 % დარჩა იმ მოსახლეობიდან რომელიც იქ კონფლიქტამდე ცხოვრობდა. 100 ათას ადამიანზე ნაკლებია. რუსული საოკუპაციო ჯარი იქ არ უშვებს არა თუ პრეზიდენტს, არამედ არასწორი ეთნიკური წარმომავლობის მოქალაქეებს. ხოლო არასწორი ეთნიკური წარმომავლობა მათთვისაა - ქართველები, უკრაინელები, ბერძნები, ესტონელები, ებრაელები, ყველა ვინ იქ ცხოვრობდა რუსების ნაწილსაც და აფხაზების ნაწილსაც", _ განაცხადა სააკაშვილმა.
მისივე თქმით, აფხაზეთში ამჟამად შედგენილია სია იმ ადამიანებისა, რომლებიც იქ არ უნდა იყვნენ - "ისინი არ უნდა იყვნენ იქ სადაც დაიბადნენ, დადიოდნენ სკოლაში, დასაც დაკრძალული არიან მათი მშობლები. მათ ნაცვლად იქ უნდა იყვნენ უცხო ქვეყნის ჯარები, იმისათვის, რათა განახორციელონ კონტროლი დაცარიელებულ ტერიტორიაზე. იმისათვის რათა ადამიანები არ დაბრუნდნენ საკუთარ სახლებში - ეს ბერლინის კედელია", _ განაცხადა საქართველოს პრეზიდენტმა.
ამას გარდა, მანვე აღნიშნა, რომ მას შემდეგ რაც 2008 წლის აგვისტოს ომის შემდეგ რუსულმა ჯარებმა ე.წ. სამხრეთ ოსეთის ტერიტორიაზე კონტროლი დაამყარეს. იქ მაცხოვრებელი მოსახლეობის უმრავლესობა იძულებული იყო საკუთარი სახლები დაეტოვებინა და საქართველოს ხელისუფლების მიერ კონტროლირებად ტერიტორიაზე გადმოსულიყო, იმიტომ რომ ოსები, სწორედ საქართველოს ხელისუფლებას მიიჩნევენ თავის დამცველად.
"ე.წ. სამხრეთ ოსეთში პრაქტიკულად არ დარჩა მოსახლეობა. მაშინ როდესაც იქ ჯარი შევიდა და გამოაცხადეს, რომ ოსების გასანთავისუფლებლად მოვიდნენ, მაშინ ოსების აბსოლუტური უმრავლესობა საქართველოს იმ რაიონებში გამოიქცა რომლებსაც საქართველოს ხელისუფლება აკონტროლებს. და ეს ბუნებრივიც იყო, ვინაიდან ეს მათი ქვეყანაა, მათი მთავრობაა და ისინი ჩვენ როგორც დამცველებს ისე გვიყურებდნენ", _ აცხადებს საქართველოს პრეზიდენტი.