ოფიციალური თბილისის შეფასებით, ადამიანის უფლებათა ევროპული სასამართლოს მიერ საქართველოს წინააღმდეგ მომზადებული განაცხადების დაუშვებლად ცნობა ცხადყოფს, რომ ისინი სამართლებრივ საფუძველს მოკლებული იყო.
"სასამართლოს მიერ მიღებული გადაწყვეტილება ცხადყოფს, რომ 2008 წლის აგვისტოს რუსეთ-საქართველოს ომთან დაკავშირებით საქართველოს წინააღმდეგ შეტანილი განაცხადები მოკლებულია სამართლებრივ საფუძველს", - ნათქვამია საქართველოს საგარეო საქმეთა სამინისტროს განცხადებაში.
შეგახსენებთ, რომ ადამიანის უფლებათა ევროპულმა სასამართლომ საქართველოს წინააღმდეგ 2008 წლის აგვისტოს რუსეთ-საქართველოს ომთან დაკავშირებული 1,549 განაცხადი დაუშვებლად გამოაცხადა. აღნიშნული გადაწყვეტილება მიღებულ იქნა მას შემდეგ, რაც სასამართლოს მხრიდან არაერთი მოთხოვნის მიუხედავად, განმცხადებლებისა და მათი ადვოკატების მიერ ვერ მოხდა სასამართლოსთვის საპასუხო პოზიციის წარდგენა. შესაბამისად, სასამართლოს გადაწყვეტილებით, აღნიშნული განაცხადებები განსახილველ საქმეთა სიიდან ამოღებულ იქნა.
განმცხადებლები, რომელთა ინტერესებსაც წარმოადგენდნენ რუსი ადვოკატები, ასაჩივრებდნენ მათ მიმართ ევროპული კონვენციის მე-2 (სიცოცხლის უფლება), მე-3 (წამების არაადამიანური და ღირსების შემლახავი მოპყრობის ან დასჯის აკრძალვა), მე-8 (პირადი და ოჯახური ცხოვრების პატივისცემის უფლება), მე-13 (სამართლებრივი დაცვის ეფექტიანი საშუალებების უფლება), მე-14 (დისკრიმინაციის აკრძალვა) მუხლებისა და პირველი დამატებითი ოქმის პირველი მუხლის (საკუთრების უფლება) დარღვევას 2008 წლის აგვისტოს რუსეთ-საქართველოს ომის დროს.