„ქართული ოცნების“ ხელისუფლება ძირს უთხრის არა მხოლოდ ქვეყნის თავისუფალ, დემოკრატიულ მომავალს, არამედ გვიზღუდავს ევროპული კეთილდღეობის მიღების შესაძლებლობას, – ამის შესახებ პარტია „გახარია საქართველოსთვის“ წევრმა, ბექა ლილუაშვილმა ბრიფინგზე განაცხადა.
ლილუაშვილის თქმით, სუვერენულმა საერთაშორისო კომპანია „ფიტჩჩმა“ საქართველოს სუვერენული საკრედიტო რეიტინგი შეუმცირა, რის მიზეზადაც სწორედ პოლიტიკური დაძაბულობა, პოლიტიკური გაურკვევლობა და სახელმწიფო ინსტიტუტების მიმართ საზოგადოების ნდობის შემცირება დაასახელა.
„შეფასებაში აღნიშნულია, რომ სტრატეგიულ პარტნიორებთან გაუარესებული ურთიერთობები გადაავადებს ქვეყნის ევროინტეგრაციის პროცესს. პოლიტიკურთან ერთად, უარესდება ქვეყნის ფინანსური კონკურენტუნარიანობაც. საერთაშორისო სავალუტო რეზერვების კლებამ, ეროვნული ბანკის დამოუკიდებლობის შემცირებამ და სახელმწიფო საწარმოების რეფორმის შეჩერებამ ასევე გავლენა მოახდინა რეიტინგის გაუარესებაზე.
„ქართული ოცნების“ ხელისუფლება ძირს უთხრის არამხოლოდ ქვეყნის თავისუფალ, დემოკრატიულ მომავალს, არამედ გვიზღუდავს ევროპული კეთილდღეობის მიღების შესაძლებლობას. რუსული კანონის მიღების შემდეგ, უკვე ვნახეთ ლარის კურსის გაუფასურება, ფასების დონის ზრდა და ინვესტიციების მკვეთრი კლება – რაც უკვე აჩენს ეკონომიკური და სოციალური სტაბილურობის პრობლემებს. თუმცა, „ქართული ოცნება“ კვლავ ტყუილების პროპაგანდით აგრძელებს, აირიდოს პასუხისმგებლობა ქვეყნის შიდა და საგარეო პოლიტიკურ დაძაბულობაზე. ამ დროს კი, საქართველოს საერთაშორისო ეკონომიკური რეიტინგები უარესდება.
მოვუწოდებთ თითოეულ მოქალაქეს, მონაწილეობა მიიღოს მომავალ არჩევნებში, რათა ერთად ჩამოვაშოროთ „ოცნების“ დაჯგუფება ერთპიროვნულ ძალაუფლებას. დღეს ეს ადამიანები ემსახურებიან არა ქვეყნის ინტერესებს, არამედ საკუთარი ქონების დაგროვებისა და დაცვის ინტერესებს, აგროვებენ კორუფციულ ფულს ჩვენი მომავლისა და ჩვენი ოჯახების კეთილდლღეობის ხარჯზე“,- განაცხადა ლილუაშვილმა.
