პენტაგონი საჰაერო-სამხედრო ძალების კოალიციასთან აგრძელებს მუშაობას F-16-ის ტიპის გამანადგურებლების მართვისთვის უკრაინელი მფრინავების მომზადებასთან დაკავშირებით, ამის შესახებ თავდაცვის სპიკერმა პეტ რაიდერმა ბრიფინგზე განაცხადა.
მისი თქმით, ახლა აშშ-ის ყურადღება გამახვილებულია კოალიციასთან მუშაობაზე საავიაციო საშუალებებთან დაკავშირებით, რათა განისაზღვროს საჭიროებები და შემდეგ ეს საჭიროებები დაკმაყოფილდეს.
„როგორც იცით, წვრთნები ტარდება როგორც არიზონაში, ასევე დანიაში. მოგეხსენებათ, არის დამატებითი წვრთნების შესაძლებლობა სხვა ადგილებში, ევროპაში, რადგან კიდევ ერთხელ, ეს იქნება გრძელვადიანი პროცესი საჰაერო კოალიციის მეშვეობით მათი მხარდაჭერის თვალსაზრისით, - თქვა რაიდერმა.
მანამდე გავრცელდა ინფორმაცია, რომ უკრაინას არ აქვს დრო, რომ ყველა F-16-ისთვის საკმარისი რაოდენობის პილოტი მოამზადოს.
როგორც The Times-ი წერდა, შეერთებული შტატები „განზრახ აჭიანურებს“ უკრაინელი მფრინავების მომზადებას F-16-ზე, რის გამოც ისინი წლის ბოლომდე საკმარისი რაოდენობის წვრთნებს ვერ მოასწრებენ.
სავარაუდოდ, ვაშინგტონმა კიევს განუცხადა, რომ სხვა ქვეყნები უკრაინელ პილოტებზე წინ დგანან წვრთნების რიგში და რომ იგი ვერ დაარღვევს მათ წინაშე აღებულ ვალდებულებებს.
მაისის ბოლოს ცნობილი გახდა, რომ უკრაინელი პილოტების პირველმა ჯგუფმა შეერთებულ შტატებში, არიზონაში მდებარე სამხედრო ბაზაზე F-16-ის ტიპის თვითმფრინავების მართვის სწავლება დაასრულა.
