„დიდი შვიდეულის“ ქვეყნები წლის ბოლომდე რუსეთის გაყინული აქტივებიდან უკრაინისთვის 50 მილიარდი დოლარის გადაცემაზე შეთანხმდნენ.
ამის შესახებ ევროკომისიის პრეზიდენტმა ურსულა ფონ დერ ლაიენმა იტალიაში G7-ის სამიტზე განაცხადა.
ფონ დერ ლაიენის თქმით, შეთანხმებების დეტალებს ფინანსთა მინისტრები ჯერ კიდევ ამუშავებენ.
50 მილიარდი დოლარის დაახლოებით ნახევარი შეიძლება უზრუნველყონ ევროკავშირის წევრმა ქვეყნებმა, მეორე ნახევარი - G7-ის სხვა ქვეყნებმა. წერს Reuters ევროკავშირის ოფიციალურ პირებზე დაყრდნობით.
გერმანიის კანცლერმა ოლაფ შოლცმა უკრაინისთვის კრედიტის გადაცემის გეგმას ისტორიული ნაბიჯი უწოდა.
„ეს არის მკაფიო სიგნალი რუსეთის პრეზიდენტისთვის, რომ მას არ შეუძლია უბრალოდ იჯდეს გულხელდაკრეფილი და იმედოვნებდეს, რომ რაღაც მომენტში ამ ომში გაიმარჯვებს მსოფლიოს ზოგიერთ ქვეყანაში ფინანსური პრობლემების გამო, რომლებიც დღეს მხარს უჭერენ უკრაინას“, - განუცხადა მან ჟურნალისტებს.
დიდი შვიდეულის გადაწყვეტილებამ, შოლცის აზრით, ასევე უნდა მისცეს უკრაინელებს გამბედაობა, გააგრძელონ თავიანთი დამოუკიდებლობისა და სუვერენიტეტის დაცვა. შოლცის თქმით, ამ სახსრების გამოყოფა ნიშნავს, რომ უკრაინა შეძლებს შეიძინოს საჭირო იარაღი და დააფინანსოს რეკონსტრუქცია.
