"ეს წელი ძალიან მნიშვნელოვანი იყო. გარდა იმისა, რომ ქვეყანაში განსაკუთრებით კარგად ჩატარდა არჩევნები, რომელიც ყველა საერთაშორისო ექსპერტმა სამართლიანად და თავისუფლად აღიარა, ასევე მივიღეთ ახალი კონსტიტუცია და რუსეთის მცდელობის მიუხედავად, საერთაშორისო ოზოლაციაში მოექცია საქართველო, ჩვენი ქვეყანა პირიქით - საერთაშორისო პოლიტიკურ ცენტრში აღმოჩნდა. ამას მოწმობს წლის განმავლობაში გამართული სამიტები და პრეზიდენტ სააკაშვილის უამრავი ორმხრივი შეხვედრა", - განაცხადა გილაურმა წლის შემაჯამებელ ბრიფინგზე და აქვე ბარაკ ობამასა და ჰილარი კლინტონთან გამართული შეხვედრები გამოყო.

რაც შეეხება მომავალ წელს, პრემიერ-მინისტრის მტკიცებით, 2011 წელი აუცილებლად სტაბილურობის გარანტი იქნება.

"თუ 2009 წელი იყო კრიზისული, ხოლო 2010 პოსტკრიზისული, 2011 წელი აუცილებლად სტაბილურობის, განვითარებისა და აღმავლობის წელი იქნება", - დასძინა მან.

ამასთან, საქართველოს მთავრობის ხელმძღვანელმა რუსეთთან სამომავლო ურთიერთობებზეც ისაუბრა და აღნიშნა, რომ თუ როგორი იქნება ის, სწორედ მეზობელ სახელმწიფოზეა დამოკიდებული.

"სააკაშვილის სამშვიდობო ინიციატივა იყო ყველაზე მკაფიო მესიჯი. ჩვენ მზად ვართ რუსეთთან მოლაპარაკების მაგიდასთან დავსხდეთ, თუმცა გააჩნია, მოსკოვი ამ წინადადებას როგორ გამოიყენებს. ამიტომ, რა იქნება 2011 წელს რუსეთთან ურთიერთობის თვალსაზრისით, ეს სწორედ მან უნდა გადაწყვიტოს", - განაცხადა საქართველოს პრემიერმა.