როდესაც კიევში მიშა სააკაშვილი რესტორანში დაიჭირეს და თმებით ათრიეს, მე ვიყავი "ოცნების" ერთადერთი წევრი, რომელიც გამოვედი და ვთქვი, რომ ეს მიუღებელია და არ მსიამოვნებს, როდესაც ჩემი ქვეყნის პრეზიდენტს ასე ექცევიან, მერე იქ, ოფისში რაღაც „რაზბორკები“ მომიწყეს, რა უნდა მოეწყოთ მაგრამ უკმაყოფილოები იყვნენ, - ამის შესახებ გადაცემა „რეაქციაში“ პარტია „საქართველოსთვის“ ლიდერმა გიორგი გახარიამ განაცხადა.
მისი თქმით, „ქართული ოცნებაც“ და ნაციონალური მოძრაობაც” სააკაშვილს იყენებენ.
„თუ ჯანმრთელია ეს ადამიანი და მკურნალობა არ სჭირდება, მისივე ინტერესების გამო, იმიტომ, რომ მისი ქეისი და მისი შემთხვევა პოლიტიკურად არ გამოიყენოს ყველამ, ვისაც არ ეზარება, რა თქმა უნდა, მისთვისვე სჯობია, რომ ამ პოლიტიკური თემიდან გაიყვანონ. ამ პოლიტიკური თემიდან თუ სააკაშვილი გაიყვანეს, ჩნდება შესაძლებლობა, ჰუმანიტარულ განზომილებაში მის პრობლემა გადაწყდეს, რა გგონიათ, მიხარია, რომ ქვეყნის პრეზიდენტი ციხეშია და ამ სამარცხვინო კადრებს რომ ანახებს „ოცნება“ მთელ მსოფლიოს, თქვენ გგონიათ ეს მე მომწონს? არ მომწონს.
ყველა ის ადამიანი, ვინც სააკაშვილის თემაში პოლიტიკურ განზომილებას აყენებს ჰუმანიტარულ განზომილებაზე მაღლა, არის მისი მტერი. ნაცებიც იმავეს აკეთებენ - ნაცებიც სპეკულირებენ და ვაჭრობენ ციხეში მყოფი ადამიანის სიტყვით, გამონათქვამით. გინახავთ, რომელიმე პატიმარი ამ ქვეყნის ისტორიაში, რომელიც სასამართლო დარბაზიდან საქმის არსებით განხილვისას, საუბრობდეს პოლიტიკური მესიჯებით და ფაქტობრივად, პოლიტიკურ აგიტაციას ეწეოდნენ. თქვენ იცით, რომელიმე სხვა პატიმარი, რომელიც ორი წელია თითქმის, სამკურნალო დაწესებულებაშია?
ჩვენ არ მოგვითხოვია სააკაშვილის ციხეში დაბრუნება, მოვითხოვეთ, მარტივი რამ გვითხარით, რატომ აძლევს სასამართლო სისტემა და პროკურატურა ადამიანს, იმის მაგივრად, რომ იმსჯელოს საქმის არსებით თემებზე, პოლიტიკური მესიჯები - იმიტომ, რომ იყენებენ. ოცნებაც იყენებს სააკაშვილს, რომ მისგან როგორმე იქნებ საფრთხობელა შექმნან და ნაციონალური მოძრაობაც იყენებს, რომ იქნებ ამ მიშასგან, რაც არის დარჩენილი, რაღაც რესურსი დააკონვერტირონ. სიმართლე არის იმაში, რომ ნაციონალური მოძრაობის დიდ ნაწილს სულ ფეხებზე კიდია მიშა სააკაშვილის ჯანმრთელობაც, მისი პოლიტიკური მომავალიც, მარტო თავის თავზე ფიქრობენ, ოცნებაც ცდილობს გამოიყენოს,“ - განაცხადა გახარიამ.
