"ამერიკის ხმის" ცნობით, ყირგიზეთის პარლამენტმა მიიღო კანონპროექტი „უცხო ქვეყნის წარმომადგენლების“ შესახებ, რომელიც რუსული „უცხოური აგენტების“ კანონის მსგავსია.
დასავლეთის ქვეყნებმა გაავრცელეს ერთობლივი განცხადება, რომელშიც გააკრიტიკეს დოკუმენტი და აღნიშნეს, რომ მისი მიღება ეწინააღმდეგება საერთაშორისო ნორმებს და საფრთხეს უქმნის 6,6 მილიონიანი ქვეყნის საგარეო დახმარებას.
კანონპროექტი აძლიერებს მთავრობის კონტროლს არაკომერციულ ორგანიზაციებზე. დოკუმენტის მიხედვით, არასამთავრობო ორგანიზაციები, რომლებიც იღებენ დაფინანსებას საზღვარგარეთიდან და ახორციელებენ პოლიტიკურ საქმიანობას, „უცხოური აგენტების“ რეესტრში მოხვდებიან. ორგანიზაციებმა, რომლებიც მიიღებენ ამ სტატუსს, ვალდებულნი არიან წარადგინონ ანგარიში მათი დაფინანსების შესახებ, წარმოადგინონ დამატებითი აქტივობების ანგარიშები და შესაძლოა დაექვემდებარონ მიმდინარე აუდიტს.
დოკუმენტი ხელმოწერისთვის პრეზიდენტ სადირ ჯაფაროვს გადაეგზავნება.
„ეს კანონი უკიდურესად უარყოფით გავლენას მოახდენს სამოქალაქო საზოგადოებაზე, უფლებადამცველებსა და ყირგიზეთის მედიაზე“, - თქვა ეუთოს დემოკრატიული ინსტიტუტებისა და ადამიანის უფლებათა ოფისის დირექტორმა მატეო მეკაჩიმ.
აშშ-ის სახელმწიფო მდივანმა ენტონი ბლინკენმა თებერვალში წერილი გაუგზავნა ჯაფაროვს, რომელშიც შეშფოთება გამოხატა „უცხოური წარმომადგენლების“ შესახებ კანონპროექტის გამო. ამანყირგიზეთის პრეზიდენტის უარყოფითი რეაქცია გამოიწვია. როგორც ადგილობრივი მედია წერს, სადირ ჯაფაროვმა მოუწოდა სხვა ქვეყნებს, მათ შორის აშშ-ის, არ ჩაერიონ ქვეყნის საშინაო საქმეებში.
