„ნაცმოძრაობის“ დაშლას, დიდი ხანია, ვგულშემატკივრობ. იმედიც კი გამიცრუა ნიკა მელიამ, რომ აქამდე არ გადადგა ეს ნაბიჯი, – ამის შესახებ პარტია „გირჩის წევრმა, დეპუტატმა იაგო ხვიჩიამ განაცხადა.
„არჩევნების წელია და მინდა, რომ პოლიტიკური კონფიგურაცია ადამიანებისთვის გასაგები იყოს, ამიტომ უფრო მკაფიო ნაბიჯების გადადგმას ვურჩევდი ნიკა მელიას. დანარჩენი ყველაფერი გასაგებია ამ ნაწილში და ნიკა მელია რომ დიდი ხანია, აკრიტიკებს „ნაცმოძრაობის“ დღევანდელ მენეჯმეტს, ეს არავისთვის ახალი არ არის. ნიკა მელიასგან ველოდები „ნაციონალური მოძრაობიდან“ წამოსვლას და ადამიანების წამოყვანას. „ნაცმოძრაობის“ ოპოზიციაში მთავარ ძალად ყოფნა არ მიმაჩნია ოპოზიციის გამარჯვების ფორმულად. ამიტომ ვგულშემატკივრობ იმას, რომ რაღაცნაირად „ნაცმოძრაობიდან“ ოპოზიციური ძალების დეკონცენტრაცია სხვა ძალებში მოხდეს. წარმოდგენა არ მაქვს, ვინ რის თამაშს თამაშობს, მაგრამ „ნაცმოძრაობის“ თანამედროვე კონფიგურაცია და თამაშის ის წესი, რომელიც ამბობს, რომ მთავარია „ნაცმოძრაობა“ და დანარჩენი პარტიები მის ირგვლივ უნდა გაერთიანდნენ, არის წაგების ფორმულა და მე ამის წინააღმდეგი ვარ“, – განაცხადა ხვიჩიამ.
