საქართველოს პრეზიდენტმა მიხეილ სააკაშვილმა სათაფლიაში გამართულ მთავრობის სხდომაზე ამერიკელი დიპლომატის, რიჩარდ ჰოლბრუკის გარდაცვალებასთან დაკავშირებით კიდევ ერთხელ გამოთქვა მწუხარება.
"მინდა გვესმოდეს, რამხელა მეგობარი დაკარგა საქართველომ. 2006-ში ჰოლბრუკმა იწინასწარმეტყველა საქართველო-რუსეთის ომი და ხმამაღლა აფრთხილებდა ამის შესახებ დასავლეთს. მაშინ მას თანამდებობა არ ეკავა, თუმცა იყო ერთ-ერთი ყველაზე დიდი გიგანტი ამერიკული დიპლომატიის და XX საუკუნის და XXI საუკუნის დასაწყისის", - განაცხადა სააკაშვილმა.
სააკაშვილმა გაიხსენა, რომ 2007 წელს, როდესაც საქართველოსაც არ ჰქონდა ბოლომდე ინფორმაცია, რიჩარდ ჰოლბრუკი გამოვიდა საჯაროდ და თქვა, რომ თბილისში ანტისამთავრობო გამოსვლების ორგანიზატორების ერთი ნაწილის უკან რუსული სპეცსამსახურები იდგა.
"გავიხსენოთ: 2008-ში რუსეთს თითქოს პროპაგანდისტულად ყველაფერი მომზადებული ჰქონდა და სქემა იყო გამზადებული, რომ საქართველო დაესხა რუსეთს თავს, რომ რუსეთი იცავდა თავს და თავის მოქალაქეებს. ხალხი იყო წასული ოლიმპიადაზე და არავის ჩვენთვის არ ეცალა. როგორც კი ატყდა ეს ომი, რიჩარდ ჰოლბრუკი არ ვიცი როგორ, რომელიღაც ბოლო რეისით ჩამოვიდა, აღარც მახსოვს რომელი რეისით მოახერხა შემოძრომა საქართველოში. მისთვის არც ფული მიუცია არავის და არც გაგვხსენებია, რომ გვეთხოვა. ეს იყო ძალიან დიდი სახელი მსოფლიო პრესისთვის და მსოფლიო დიპლომატიისთვის, განსაკუთრებით ზოგიერთი მემარცხენე ელემენტისთვის, რომლებიც თვლიდა, რომ ვინაიდან ჩვენ ვმეგობრობდით ჯორჯ ბუშთან, ამიტომ ეს იყო საბაბი, საქართველოსთვის ისე არ დაეჭირათ მხარი", _ განაცხადა მან.
სააკაშვილის განცხადებით, რიჩარდ ჰოლბრუკი იყო ყველაზე ბრწყინვალე ვარსკვლავი დემოკრატიული პარტიისა საგარეო პოლიტიკის სფეროში. ამიტომ მისი ჩამოსვლა იმ პერიოდში შეიძლება უფრო გადამწყვეტი იყო, ვიდრე თვითონ რესპუბლიკური ადმინისტრაციის მხარდაჭერა.
"ჩამოვიდა და დასახლდა სასტუმრო "კოპალაში", რომელიც იყო მუდმივი დაბომბვების საფრთხის ქვეშ. ყველა ტელევიზიას თვითონ ურეკავდა და ყველა ტელევიზიას თვითონ ერთვებოდა. ამ კაცმა ითამაშა გადამწყვეტი როლი საქართველოს სახელმწიფოებრიობის გადარჩენაში და თბილისის გადარჩენაში.
მასთან სულ მქონდა ურთიერთობა, განსაკუთრებით ბოლო კვირებში. გარდაცვალებამდე რამდენიმეჯერ მელაპარაკა და სულ იყო ჩართული საქართველოს საქმეებში - ჩვენთვის ასეთი ადამიანის დაკარგვა მნიშვნელოვანია, მაგრამ მისი არსებობაც ძალიან მნიშვნელოვანი იყო", _ განაცხადა მან.
სააკაშვილის განცხადებით, ამერიკა არის ქვეყანა, სადაც მუდმივად ჩნდებიან ასეთი იდეალისტები, რომლებიც მზად არიან იბრძოლონ უცხო ქვეყნების თავისუფლებისთვის და ძლიერებისთვის.
"რიჩარდ ჰოლბრუკი ჩემი არც ბიძაშვილი იყო და არც ჩემი თანაკურსელი. იქ გავიცანი, იმ საქმეში, რაც ეხებოდა საქართველოს თავისუფლების გამტკიცებას. ერთ-ერთი ბოლო შეხვედრის დროს მან მითხრა, მთავარი, რაც გააკეთეთ, თქვენ გადაარჩინეთ საქართველოს სახელმწიფოებრიობაო. ეს მითხრა 2008 წელს, პირდაპირ ომის შემდეგ. ეს ომი დამთავრებული არ არის. 2 წლისთავზე თუ იტყვიან, რომ საქართველო გადარჩა ეკონომიკურად, ესე იგი თქვენი სახელმწიფოებრიობა გადარჩა და ყველაფერი დაგიბრუნდებათ უკანო. ჩემი გამოცდილებით, მას არც ერთი პროგნოზი არ შეშლია" _ განაცხადა პრეზიდენტმა.
მისი განცხადებით, ამ ეტაპზე მთავარია სახელმწიფოებრიობის გადარჩენა და ამას მოჰყვება ტერიტორიების დაბრუნება.
"ეს იცოდა კარგად ჰოლბრუკმა და ეს იცის კარგად ჩვენმა მტერმა", _ განაცხადა მან.