პარლამენტში ეროვნული ბანკის პრეზიდენტის მოვალეობის შემსრულებელს უსმენენ.
როგორც არჩილ მესტვირიშვილმა განაცხადა, - ფინანსური სტაბილურობის ხელშეწყობა ეროვნული ბანკის ერთ-ერთ უმნიშვნელოვანესი ამოცანაა.
„ფინანსური სტაბილურობის ხელშეწყობა, როგორც მდგრადი ეკონომიკური ზრდის წინაპირობა, ეროვნული ბანკის ერთ-ერთ უმნიშვნელოვანეს ამოცანას წარმოადგენს. ფინანსური სტაბილურობის უზრუნველსაყოფად ეროვნული ბანკი მაკროპრუდენციულ პოლიტიკასა და საფინანსო სექტორის ზედამხედველობას ახორციელებს. ეროვნული ბანკის მაკროპრუდენციული პოლიტიკის ძირითად ინსტრუმენტად კაპიტალის კონტრციკლური ბუფერი გამოიყენება. მისი მიზანია, საჭიროების შემთხვევაში ეკონომიკის ისეთი ჭარბი დაკრედიტება შეზღუდოს, რომელიც სისტემური რისკების ზრდას იწვევს. უნდა აღინიშნოს, რომ 2022 წლის ნოემბერში საქართველოს ეროვნული ბანკის ფინანსური სტაბილურობის კომიტეტმა ბაზელის კომიტეტის რეკომენდაციის გათვალისწინებით კონტრციკლური ბუფერის დაწესების ჩარჩოს განახლების გადაწყვეტილება მიიღო. 2022 წლის ბოლოსთვის საკრედიტო აქტივობა მდგრად დონეზე, ეკონომიკური ზრდა კი მაღალ დონეზე ნარჩუნდებოდა, ასევე, გაუმჯობესდა ბანკების ფინანსური მაჩვენებლები, ხოლო უძრავი ქონების ბაზარზე ფასებისა და ქირის ზრდის ტენდენცია შეინიშნებოდა. აღნიშნული ტენდენციის გათვალისწინებით, ფინანსური სტაბილურობის კომიტეტმა ჩათვალა, რომ მნიშვნელოვანია ფინანსურმა სექტორმა კაპიტალის ბუფერები დააგროვოს, რათა მათი სტრესულ პერიოდებში გამოყენება შეძლოს, როგორც ეს პანდემიის დასაწყისში მოხდა. ეროვნული ბანკის მიერ პანდემიამდე გატარებული მაკროპრუდენციული და მიკროპრუდენციული ზომებისა და პანდემიისა და რუსეთ-უკრაინის ომის დაწყების შემდეგ შემუშავებული ფინანსური სტაბილურობის პოლიტიკის შედეგად, ფინანსურმა სექტორმა მდგრადობა შეინარჩუნა და ეკონომიკის დაკრედიტება წარმატებით განაგრძო. ფინანსური სექტორის მზაობას, ასევე, ხელი შეუწყო ბანკების აქტივების ხარისხის მდგრადობამ, რაშიც მნიშვნელოვანი წვლილი კრიზისამდელ პერიოდში შინამეურნეობების ჭარბვალიანობისა და სესხების დოლარიზაციის შემცირების მიზნით გატარებულმა მაკროპრუდენციულმა ზომებმა შეიტანა. გატარებული ღონისძიებების ფონზე ფინანსური მაჩვენებლები გაუმჯობესებულია, რაც ქვეყნის ფინანსური სისტემის სიჯანსაღეზე მიუთითებს,“ - აღნიშნა სებ-ის პრეზიდენტის მოვალეობის შემსრულებელმა, არჩილ მესტვირიშვილმა.
