ეროვნული ბანკის ინფორმაციით, 2023 წლის აპრილში, საქართველოში შემოსული ფულადი გზავნილების მოცულობამ 369,7 მილიონი აშშ დოლარი (933,3 მილიონი ლარი) შეადგინა, რაც 20,0%-ით (61,6 მილიონი აშშ დოლარით) მეტია 2022 წლის აპრილის ანალოგიურ მაჩვენებელზე.

უცხოეთიდან საქართველოში ფულადი გზავნილების 97,2% იმ 23 უმსხვილეს პარტნიორ ქვეყანაზე მოდის, საიდანაც გზავნილების მოცულობა აპრილში თითოეულზე 1 მილიონ აშშ დოლარს აღემატებოდა. იმავე 23 ქვეყანაზე გასული წლის აპრილში მთელი ფულადი გზავნილების 97,0% მოდიოდა.

აპრილში, ევროკავშირის ქვეყნებიდან საქართველოში ჩაირიცხა 103,45 მილიონი აშშ დოლარი, მათ შორის ყველაზე მეტი - 40,86 მილიონი დოლარი იტალიიდან გადმოირიცხა. შემდეგ მოდის საბერძნეთი - 20, 40 მილიონი დოლარი, გერმანია - 18,01 მილიონი დოლარი.

ამერიკის შეერთებული შტატებიდან საქართველოში გადმოირიცხა 34,20 მილიონი დოლარი.

აპრილში, ქვეყანაში ყველაზე მეტი თანხა რუსეთის ფედერაციიდან გამოიგზავნა და 159,57 მილიონი დოლარი შეადგინა.

ამასთან, 2023 წლის აპრილში, საქართველოდან საზღვარგარეთ 28, 4 მილიონი აშშ დოლარი (71,8 მილიონი ლარი) გადაიგზავნა. რაც 2022 წლის აპრილის (25,4 მლიონი დოლარი) ანალოგიურ მაჩვენებელთან შედარებით 12,0 პროცენტით მეტია.