უკრაინის უსაფრთხოების სამსახურში აცხადებენ, რომ რუს ოკუპანტებს უნდა ახსოვდეთ, რომ უკრაინაში ჩადენილი ომის დანაშაულებისთვის მათ სამართლიანი შურისძიება ელოდებათ.
უწყებაში კომენტარი გააკეთეს რუსეთში რუსი პროპაგანდისტის, უკრაინაში პუტინის ომის აქტიური მხარდამჭერის ზახარ პრილეპინის ავტომობილის აფეთქებასთან დაკავშირიებით.
„ოფიციალურად ვერც დავადასტურებთ და ვერც უარვყოფთ უკრაინის უსაფრთხოების სამსახურის კავშირს ამა თუ იმ შემთხვევასთან, რომელიც ოკუპანტებს და მათ თანამოაზრეებს ემართებათ.
ამასთან, როგორც მანამდე უკრაინის უსაფრთხოების სამსახურის ხელმძღვანელმა ვასილი მალიუკმა განაცხადა, ოკუპანტებს, რომლებმაც ჩვენს მიწზე მოიტანეს ომი, სიკვდილი და ძალადობა - სიკვდილი ერთადერთი პერსპექტივაა, რომელიც ჩვენ შეგვიძლია შევთავაზოთ.
ის, თუ ვინ დგას ამა თუ იმ შემთხვევის უკან - ამაზე შეგვიძლია ვილაპარაკოთ ჩვენი გამარჯვების შემდეგ“, - განაცხადეს უწყებაში.
შაბათს, 6 მაისს, რუსეთის ნიჟეგოროდის ოლქში ააფეთქეს ცნობილი უკრაინოფობის, მწერლის, პროპაგანდისტის, პარტია „სამართლიანი რუსეთის“ წევრის ზახარ პრილეპინის Audi-ის მარკის ავტომობილი. დაშავდა თავად პრილეპინი, ერთი ადამიანი კი დაიღუპა. პრილეპინის მდგომარეობა მძიმეა, მას ოპერაცია ჩაუტარდა
რუსეთის შინაგან საქმეთა სამინისტროში განაცხადეს, რო დააკავეს პირი, რომელიც შესაძლოა კავშირში იყოს პრილეპინის ავტომობილის აფეთქებასთან. რუსეთის საგამოძიებო კომიტეტში განაცხადეს, რომ დაკავებული წარმოშობით უკრაინელი ალექსანდრ პერმიაკოვია, უწყების განცხადებით, მან დანაშაული აღიარა.
