რუსი ოკუპანტები განაგრძობენ ძირითადი ძალისხმევის კონცენტრაციას შეტევითი მოქმედებების განსახორციელებლად ლიმანის, ბახმუტის, ავდიივკისა და მარინკის მიმართულებებით. ყველაზე სასტიკი ბრძოლები მიმდინარეობს ბახმუტისთვის და მარინკასთვის. დღის განმავლობაში უკრაინის დამცველებმა მტრის 40 შეტევა მოიგერიეს.
უკრაინის შეიარაღებული ძალების გენშტაბის ცნობით, ოკუპანტებმა 6 ავია და 19 სარაკეტო დარტყმა განახორციელეს, მათ შორის ცამეტი С-300 ტიპის საზენიტო-სარაკეტო კომპლექსებიდან მშვიდობიანი მოსახლეობის წინააღმდეგ სლავიანსკსა და კრამატორსკში. სლავიანსკში რუსეთის ძალების იერიშს 5 ადამიამი ემსხვერპლა და 15 დაშავდა. ამის გარდა, მტერმა 20-მდე შეტევა განახორციელა ზალპური ცეცხლის რეაქტიული სისტემებიდან.
უკრაინის მთელ ტერიტორიაზე სარაკეტო და საავიაციო დარტყმების საფრთხე კვლავ შენარჩუნებულია, რადგან მტერი ისევ გამოიყენებს ტერორის ტაქტიკას მშვიდობიანი მოსახლეობის წინააღმდეგ. უკრაინის თავდაცვის ძალებმა დღის განმავლობაში ოკუპანტების კონცენტრაციის უბნებს 5 დარტყმა მიაყენეს.
ასევე, დღის განმვალობაში სარაკეტო და საარტილერიო დანაყოფებმა გაანადგურეს მტრის 1 მართვის პუნქტი, ცოცხალი ძალის კონცენტრაციის რაიონი, ოკუპანტების შეიარაღება და სამხედრო ტექნიკა, ასევე ერთი რადიოლოკაციური სადგური.
