პენტაგონის საიდუმლო დოკუმენტების გაჟონვის საქმეზე გამოძიების ფედერალურმა ბიურომ საჰაერო ძალების ეროვნული გვარდიის წევრი, 21 წლის ჯეკ ტეიშეირა დააკავა.
„დღეს იუსტიციის დეპარტამენტმა დააკავა ჯეკ დუგლას ტეიშეირა აშშ-ის ეროვნულ უსაფრთხოებასთან დაკავშირებული საიდუმლო ინფორმაციის არაავტორიზებული გადაცემის გამოძიებასთან დაკავშირებით. ტეიშეირა არის აშშ-ის საჰაერო ძალების ეროვნული გვარდიის წევრი“, - აღნიშნა აშშ-ის გენერალურმა პროკურორმა, მერიკ გარლანდმა.
მანამდე პენტაგონის ოფიციალურმა წარმომადგენელმა გენერალმა პეტ რაიდერმა განაცხადა, რომ საიდუმლო მასალების გაჟონვა იყო წინასწარ განზრახული სისხლის სამართლის დანაშაული.
7 აპრილს ცნობილი გახდა, რომ პენტაგონის საიდუმლო დოკუმენტების გაჟონვასთან დაკავშირებით აშშ-ის იუსტიციის დეპარტამენტმა გამოძიება დაიწყო. შიდა მოკვლევა მიმდინარეობს პენტაგონშიც.
