ჩრდილოეთ კორეამ, სავარაუდოდ, ბალისტიკური რაკეტის ახალი მოდელი გამოსცადა.
ამის შესახებ სააგენტო Yonhap სამხრეთ კორეელ სამხედროებზე დაყრდნობით იუწყება.
„არსებული ინფორმაციის თანახმად, მიგვაჩნია, რომ გაშვებულია საშუალო ან შორის მანძილის ახალი მოდელის ბალისტიკური რაკეტა. ჩვენი შეფასებით, ეს არის ერთ-ერთი ის სისტემა, რომელიც წარმოდგენილი იყო აღლუმზე“, -ამის შესახებ შტაბების უფროსთა კომიტეტის თავმჯდომარემ განაცხადა. სააგენტო აღნიშნავს, რომ თებერვალში ფხენიანში გამართული აღლუმის დროს წარმოდგენილი იყო ახალი კონტინენეტთაშორისო ბალისტიკური რაკეტა.
ამის გარდა, შტაბების უფროსთ კომიტეტის თავმჯდომარე არ გამორიცხავს, რომ ჩრდილოეთ კორეის მიერ რაკეტის გამოცდა კავშირში იყოს თანამგზავრის გაშვების სამზადისთან. მანამდე ჩრდილოეთ კორეამ განაცხადა,რომ აპრილში სადაზვერვო თანამგზავრზე მუშაობის დასრულებას გეგმავს.
12 აპრილს, სამხრეთ კორეელმა სამხედროებმა განაცხადეს, რომ დააფიქსირეს ბალისტიკური რაკეტის გაშვება ფხენიანის შემოგარენიდან იაპონიის ზღვის მიმართულებით. სეულის მონაცემებით, რაკეტამ დაახლოებით 1000 კმ იფრინა.
სამხრეთ კორეის ეროვნული უსაფრთხოების საბჭომ მკაცრად დაგმო ჩრდილოეთ კორეის ქმედებები და მას გაეროს უშიშროების საბჭოს რეზოლუციის უხეში დარღვევა უწოდა. სამხრეთ კორეის ეროვნული უსაფრთხოების საბჭოს წევრებმა განაცხადეს, რომ აუცილებელია იაპონიასთან და აშშ-სთან ინფორმაციების გაცვლის გაძლიერება.
